Komandanti i forcave të SHBA-së në Evropë, Curtis M. Scaparrotti, tha gjatë një dëshmie para komitetit për Forca të Armatosura të Senatit amerikan, se situata e sigurisë në Ballkan është shumë e brishtë dhe vendet e Ballkanit janë shënjestra kryesore të ndikimit malinj të Rusisë.
Duke iu referuar raporteve serbo-shqiptare, më saktë dialogut të kërkuar mes Prishtinës dhe Beogradit, Scaparrotti, i cili gjithashtu është komandant Suprem i Aleancës i NATO-s në Evropë, e ka quajtur Ballkanin një rajon me rëndësi strategjike.
“Negociatat ndërmjet Kosovës dhe Serbisë për normalizimin e raporteve dhe arritjen e një zgjidhje afatgjate që është e zbatueshme për dyja vendet janë aktualisht në pritje. Rusia e ushqen paqëndrueshmërinë rajonale në përpjekje për të parandaluar vendet e Ballkanit në përparimin e tyre drejt integrimit euroatlantik”, tha gjenerali, duke nënvizuar faktin se Rusia e kundërshton njohjen e Kosovës si shtet Sovran, e që paralel, përmes ndihmës politike, ushtarake dhe ekonomike mundohet të ruaj ndikimin e saj në Serbi.
Ai theksoi po ashtu se Rusia është konkurrente afatgjatë strategjik që i sheh Shtetet e Bashkuara dhe Aleancën e NATO-s si kërcënim kryesor për ambiciet e saj gjeopolitike.
“Moska synon të shtrijë ndikimin në vendet periferike të saj, për të minuar solidaritetin e NATO-s dhe për të shkelur rregullat në të cilat bazohet rendi ndërkombëtar”, shtoi gjeneral Scaparrotti.
