Një ceremoni u mbajt në komandën e KFOR në Prishtinë, gjatë së cilës ish-komandanti Lorenzo D’Addario ia dorëzoi detyrat pasardhësit të tij, Michele Risi.
Përveç udhëheqësve të Kosovës, në ceremoni morën pjesë admirali i Forcës së Përbashkët të NATO-s në Napoli, gjenerali amerikan James Foggo, i cili, ndër të tjera, u bëri thirrje partive fituese që të krijojnë një qeveri të re sa më shpejt, e cila do ta çojë Kosovën drejt stabilizimit dhe prosperitetit.
“Tani ju keni mundësinë për të formuar një qeveri të re. Zgjedhjet kanë qenë dhe ne kemi dëgjuar shumë gjëra të mira. Unë këshillojqytetarët e Kosovës dhe udhëheqësit e sapozgjedhur që ta çojnë vendin drejt stabilitetit dhe prosperitetit”, tha ai.
Foggo tha se NATO nuk ka ndërmend të zvogëlojë forcat e KFOR-it në Kosovë dhe kështu iu përgjigj Presidentit Hashim Thaçi, i cili më parë tha se falë formimit të Ushtrisë së Kosovës, forcat e KFOR-it mund të zvogëloheshin.
Komandanti në largim tha se KFOR-i është një forcë e besueshme, e paanshme dhe e aftë që ofrojë siguri jo vetëm në Kosovë.
Pasardhësi i tij tha se forcat aleate të NATO-s ishin duke kontribuuar në sigurinë e gjithë popullatës në Kosovë dhe ruajtjen e stabilitetit në rajon dhe Evropë.
“Unë kam për qëllim të siguroj që vlerat e NATO-s inkurajojnë KFOR-in që të arrijnë standardet më të mira të shërbimit, në një formacion në të cilin secili individ mund të japë kontribute të vlefshme, të forcojë aftësitë e tij dhe të jetë krenar që është nëtar i rëndësishëm i komunitetit profesional ushtarak”, tha D’Addario.
Nga ana tjetër, presidenti Thaçi tha se angazhimi i KFOR-it solli më shumë paqe dhe stabilitet në Kosovë.
“Edhe pas 20 viteve të pranisë në Kosovë, KFOR është ende një nga organizatat që gëzon besimin më të lartë të qytetarëve tanë. Ky besim i madh nuk është aspak i rastësishëm, por për shkak të punës profesionale, të paanshme dhe të suksesshme që ushtarët e KFOR-it kanë bërë, jo vetëm në mbrojtjen e kufijve të jashtëm të Kosovës dhe hapësirës ajrore të saj, por veçanërisht në mbështetjen e Kosovës brenda vendit”, tha Thaçi.
Në vitin 1999, pas mbërritjes në Kosovë, paqeruajtësit e KFOR-it numëruan rreth 50,000 trupa, ndërsa sot numri i tyre është rreth 4,000. /tesheshi.com/
