Si pasojë e të reshurave të mëdha që kanë përfshirë qytetin e Pejës gjatë natës që shkoi dhe mëngjesit të sotëm, shumë rrugë të këtij qyteti janë vërshuar nga ujë.
Mësohet se disa rrugë janë të pakalueshme, ndërsa ende nuk dihet për dëme materiale.
Duke u bazuar në gjendjen emergjente të krijuar nga reshjet e mëdha, kryetari i Komunës së Pejës, Gazmend Muhaxheri, në takim me të gjithë drejtorët, ka ngritur shtabin emergjent.
Po ashtu bëhet e ditur se në të gjitha shkollat e qytetit është ndërprerë procesi mësimor deri në njoftimin e ri.
“Gjendja në rrugët e qytetit dhe në disa lagje është e rëndë, komunikimi është i vështirësuar për shkak të vërshimeve. Rreshjet janë aq të mëdha, saqë infrastruktura ekzistuese për shkarkimin e ujërave të reshjeve nuk po e përballon këtë situatë. Ftohen të gjithë qytetarët që të kontribuojnë që të evitohen aq sa është e mundur dëmet në njerëz dhe mallra.
Njoftojmë se me kërkesë të shtabit emergjent është ndërprerë mësimi në të gjitha shkollat e qytetit.
Luten të gjithë qytetarët që të komunikojnë me këtë shtab, duke thirrur në telefonat përkatës”, thuhet në njoftimin e lëshuar nga Komuna e Pejës. /tesheshi.com/
