“Ekipet që po gjurmojnë për mbetjet e aeroplanit të “EgyptAir” në detin Mesdhe, kanë gjetur sot trupa udhëtarësh, ulëse dhe valixhe”, ka deklarurar ministri grek i Mbrojtjes, Panos Kamenos.
“Para disa orësh, autoritetet egjiptiane na kanë lajmëruar se kanë gjetur pjesë trupi, dy ulëse dhe një ose më shumë valixhe afër bregut të Aleksandrisë, ku po kryhen kërkimet”, ka theksuar Kamenos në një konferencën për media.
Ai ka saktësuar se këto objekte janë vërejtur në jug të zonës ku është zhdukur aeroplani nga radari natën e së mërkurës, pak më në veri nga lokacioni në të cilin ishin gjetur disa objekte të enjten paradite, për të cilat autoritetet nuk kishin mundur t’i identifikojnë si objekte të aeroplanit të zhdukur.
Edhe ushtria egjiptiane ka deklaruar se ka gjetur pjesë të mbetjes së aeroplanit të EgyptAir.
Siç thuhet, pjesët e mbetjeve janë gjetur 290 kilometra më në veri të qytetit mesdhetar të Aleksandrisë.
Marina e ushtrisë egjiptiane siç thuhet në deklaratë, poashtu ka gjetur disa gjëra personale të udhëtarëve, dhe për momentin është duke kërkuar atë zonë, me qëllim të gjetjes së kutisë së zezë, ka njoftuar Reuters.
Hetuesit nga Egjipti, Britania, Franca si dhe ekspertë nga “Airbus”, do të ekzaminojnë pjesët e mbetjeve të aeroplanit të “EgyptAir”, të cilat janë gjetur në ujërat e Egjiptit.
Ata do ta kryejnë ekzaminimin në momentin kur pjesët e mbetjeve të tërhqen në breg, ka njoftuar AP, duke iu referuar deklaratave të një zyrtarit anonim të aeroportit egjiptian. Hetimet do t’i udhëheqë kreu i komitetit qeveritar të Egjiptit, Ayman el Mokadem.
Ministri francez për Punë të Jashtme Jean Marc Ayralt ka deklaruar sot se për momentin “nuk ka absolutisht asnjë shenjë” që na çon drejt gjetjes së shkaktarit të rrëzimit të aeroplanit të kompanisë “EgyptAir”.
Ai ka shtuar se përfaqësues të qeverisë franceze pritet të takohen me familjarë të viktimave, në mënyrë që t’u përcjellin atyre gjitha informatat të cilat i kanë në dispozicion.
Në kërkimet në afërsi të ishullit Karpatos, po marrin pjesë edhe Greqia Egjipti, Franca dhe Britania, ka raportuar BBC.
Tre hetues francez dhe një eksperte teknikë nga kompania “Airbus” kanë arritur në mëngjes në aeroportin ndërkombëtar të Kairos me qëllim të ofrimit të ndihmës për gjetjen e aeroplanit të zhdukur, kanë njoftuar burimet e aeroportit.
Franca po merr pjesë në komisionin hetues, si vendi ku është prodhuar aeroplani dhe për faktin se 15 shtetas të saj kanë qenë brenda në aeroplan. Nga 66 udhëtarë dhe pjestarë të ekuipazhit sa kanë qenë gjithsejt në aeroplan, 30 janë shtetas të Egjiptit, njofton agjencia britanike.
Aeroplani “EgypAir” i tipit “Airbus A320”, i cili po fluturonte në linjën Paris-Kairo, ishte zhdukur nga radari natën e së mërkurës, ndërsa autoritetet egjiptiane kanë hedhur dyshimet në rrëzimin e aeroplanit si shkak i një shpërthimi më bombë, edhe pse nuk përjashtojnë mundësinë e ndonjë defekt teknik. /tesheshi.com/
