Një gjest i madh ndershmërie ka ndryshuar gjithë periudhën e festave të fundvitit për dy persona. Mund të ishte një fundvit shumë i mirë dhe premtues për Luigi Tidei, i cili jeton në Comunanza të Italisë, ku edhe punon si shofer në një kompani. Ai është i martuar dhe baba i tre fëmijëve, mirëpo nuk është tunduar aspak nga një shumë e madhe parash, të cilat nuk ishin të tijat.
“43 mijë euro nuk më ndryshojnë jetën, por një veprim i mirë mund të ma ndryshojë. Dhe në fund të fundit, e vetmja gjë që me të vërtetë ka rëndësi, është gjesti i mirë dhe mirësia”,- thotë Luigi. Tre ditë më parë, në një vend parkimi për makinat ai ka gjetur shumën e madhe të parave që i kishin rënë një tregtari, ndërsa ka qenë duke bërë pazar në një nga qendrat tregtare të qytetit.
Përpara se të hipte në makinë, Luigi vuri re një çantë në brendësi të së cilës ndodhej një portofol i mbushur mirë me kartëmonedha, një celular dhe një kartë identiteti.
“Isha në parkim dhe pashë një çantë përtokë. Ishte poshtë një makine. E mora dhe pasi e hapa vura re se brenda saj kishte shumë para. Më dridheshin duart”,- rrëfen Luigi Tidei.
Pa e menduar dy herë ai u mundua që të gjitha paratë dhe sendet që ndodheshin brenda në çantë t’i ktheheshin sa më parë të zotit. “Kur pashë Tidein dhe e kuptova se çfarë bëri ai, vendosa që ta shpërblej, por ai nuk pranoi asnjë gjë”,- tregon pronari i parave./tesheshi.com/
