Në vend të drejtësisë së munguar, 6 vite pas vdekjes së tyre të pafajshme në shesh, 4 viktimat e protestës së opozitës së atëhershme “peshohen” në para….
Pas 3 ditësh mbushen plot 6 vjet nga dita kur në mes të bulevardit “Dëshmorët e Kombit”, para godinës së Kryeministrisë u vranë 4 vetë. Ata ishin protestues të thjeshtë, pjesë e turmës së thirrur në shesh nga Edi Rama, kryetar i Partisë Socialiste në opozitë. Ata nuk ishin të armatosur dhe as të dhunshëm, dhe pse atë ditë u gjuajtën disa gurë drejt godinës.
Atë ditë ata kishin dalë në shesh bashkë me mijëra të tjerë të zemëruar nga makutëria e pushtetit pasi Ilir Meta, atëkohë aleat në qeverisje, doli me zë e figurë duke numëruar milionat e korrupsonit në bllokun e tij.
Ata u vranë nga plumbat e Gardës së Republikës me një urdhër politik. Në zyrë në kryeministri ishte atë kohë kryeministri Sali Berisha.
Sot në atë zyrë është ulur Edi Rama, por gjaku i 4 të vrarëve vazhdon t’i rëndojë në pllakat përkujtimore ku shkel sa herë del në bulevard…dhe ndoshta në ndërgjegje, pasi ndaj tyre nuk është dhënë akoma drejtësia që ai u kishte premtuar, por dhe për një arsye tjetër se ka bërë “pakt me djallin” (Ilir Metën) për t’u ulur në atë karrige.
400 milionë për 4 jetë njerëzish
Me një vendim të marrë së fundi në mbledhjen e qeverisë, familjarët e 4 viktimave të 21 Janarit do të dëmshpërblehen me 400 milionë lekë, pra nga 100 milionë për jetë njeriu. Paratë do të shkojnë për familjet e Aleks Nikës, Hekuran Dedës Faik Myrtajt dhe Ziver Veizit.
Qeveria e vlerësoi jetën e baballarëve, bashkëshortëve, djemve të tyre të tyre me para.
Ilir Meta i pati quajtur “kokëpalarë”, ndërsa Berisha që besohet se është urdhëruesi politik i këtyre vrasjeve nuk shprehu kurrë keqardhje për humbjen e 4 jetëve. Gjykata dha ca dënime për gardistët që shkrehën armën, ndërsa drejtësia e vërtetë nuk u vendos kurrë siç prisnin familjarët.
Qëllimi i projektvendimit është shlyerja e detyrimeve që rrjedhin nga zbatimi i vendimeve gjyqësore të Gjykatës Administrative të Shkallës së Parë për viktimat e ngjarjes së 21 Janarit 2011.
Fatkeqësisht, ata ishin viktima të politikës dhe të tillë mbeten dhe sot pas kaq vitesh.
Një vit pas vdekjes së tyre, kur Ilir Meta u “pafajësua” nga gjykata, Edi Rama u shpreh se “shpallet i pafajshëm nga drejtësia pushtetari, që provokoi keqaz një popull të tërë me videokusarinë e tij dhe të pafajshmit as të mos prehen dot të qetë për shkak se s’ka asnjë shenjë drejtësie për të ndëshkuar vrasjen e tyre me pushkën e shtetit”.
Por më vonë në prill të atij viti ai bëri marrëveshje me Metën duke “i vrarë” për herë të dy protestuesit e tij.
Sot, edhe me kartonat e ministrave të Ilir Metës, u mbuloi varret me para. Në fund të fundit aksioma se “çdo gjë e ka një çmim” funksion edhe kur bëhet fjalë për një jetë njeriu. /tesheshi.com/
