Tre adoleshentë kanë humbur jetën në Jabllanicë afër Gjakovës nga shembja e një shtëpie.
Sipas policisë së Kosovës, shtëpia është shembur rreth orës 22:50 të mbrëmjes së kaluar. Një soletë betoni e një shtëpie ku nuk banonte askush u rrëzua duke bllokuar tre adoleshentë poshtë. Menjëherë në vendngjarje ka mbërritur policia dhe ambulanca, si dhe zjarrfikësit.
Por ekipi i ambulancës ka mundur vetëm të konfirmojë vdekjen e tre adoleshentëve të moshës 15 dhe 16 vjeçare.
“Po i njoftojmë banorët e Jabllanicës se ka ndodhur një aksident me rrënimin e një objekti dhe Idal Ramaj, Ramë Mehmetaj dhe Veton Morina janë bllokuar nën rrënoja. Jemi në pritje të rezultateve të autopsisë”, kanë thënë ata.
Kryetari i Komunës së Gjakovës, Adrian Gjini, është shprehur i tronditur nga kjo vdekje e trefishtë. Në një postim në Facebook, ai ka shprehur ngushëllimet e tij për familjet e viktimave.
“U trondita nga lajmi për humbjen e jetës së tre fëmijëve sonte në Jabllanicë! Familjeve u shpreh ngushëllimet më të thella. Nuk ka fjalë për të shprehur dhimbjen! Të bëjmë gjithçka që të jemi pranë familjeve në këto momente të vështira. Qofshin engjëj në qiell”, ka shkruar Gjini. /tesheshi.com/
