Gjakova ka bërë gati dokumentet e krimeve të luftës në këtë komunë dhe i ka dërguar në Prokurorinë Speciale, duke përgatitur dosjet për 12 serbë të dyshuar si të përfshirë në ngjarjet në fjalë.
Shkëndije Hota, përfaqësuesja e familjeve që mblodhën të dhënat, tha se kontingjenti i këtyre kallëzimeve penale është bërë nga vetë dëshmitarët e rasteve, ku si të tillë kanë qenë vetë prezent qoftë vrasje apo dhunime seksuale nga forcat serbe.
Ajo bën thirrje për më shumë presion shtetëror, pasi procedurat gjyqësore edhe ashtu marrin kohë më shumë se sa mund të pritet.
“Le të bëjmë presion sa më shumë që kriminelët të cilët janë pjesëmarrës të këtyre krimeve në komunën e Gjakovës të fillojnë një procedurë penale ndaj tyre. Këto kallëzime penale nuk janë përralla, por ngjarje të vërteta. Ne e dimë se si shkojnë procedurat gjyqësore. Ne nuk presim që këto të bëhen me shkop magjik”, tha ajo.
Kriminelët të cilët janë paditur janë të identifikuar nga dëshmitarët dhe tani materiali është në duar të prokurorisë.
Komuna e Gjakovës është mjaft e prekur nga lufta e para 20 vitesh, ku 1600 persona llogaritet të jenë të vrarë dhe qindra të zhdukur, ndërsa afro 5000 gra kanë dëshmuar përdhunim në këtë komunë. /tesheshi.com/
