PD zyrtare reagoi me anë të një deklarate kundër një posteri të kandidatit berishist për Tiranën, i cili shkaktoi reaksion për shkak të një gjesti me nëntekst të padenjë për hapësirat publike – gishti i mesit – edhe pse kundër një të keqeje si korrupsioni.
“Kërkojmë që të ndalohen publikimi i posterave politike me mesazhe dhe gjeste kundër etikës, kundër normave të pranuara të komunikimit dhe politikës, të cilët përcjellin dhe nxisnin në shoqërinë shqiptare fyerje, sharje, dhe shkelin kodet e sjelljes së mirë”, u tha drejtoresha e komunikimit të PD, Mirela Karabina.
Ajo qe kritike dhe ndaj mazhorancës në mënyrën e përçimit të mesazheve politike kur tha se “Kryeministri i Shqipërisë , Edi Rama, në takimet e tij elektorale po përdor gjithmonë e më shumë një gjuhë ofenduese, turpëruese dhe linçuese ndaj kundërshtarëve politikë dhe opozitës në tërësi”.
“Qëllimet politike nuk duhet të tejkalojnë asnjëherë etikën e komunikimit dhe normat e një shoqërie të civilizuar.
Bashkëjetesa, komunikimi brenda normave, sjellja e mirë dhe toleranca janë parime të cilat ndihmojnë shoqëritë të emancipohen, ndihmojnë politikën të jetë në funksion të zhvillimit demokratik dhe ekonomik.
Çdo gjest apo fjalor kundër këtyre parimeve shkakton regres, prapambetje dhe një klime konfliktale brenda shoqërisë shqiptare. Prandaj i bëjmë thirrje forcave politike, liderëve politik të përdorin një gjuhë dhe një retorikë të pranueshme brenda rregullave demokratike që përcakton një garë elektorale”, theksoi zyrtarja demokrate. /tesheshi.com/
