Skuadra e Gironës fitoi të dielën një ndeshje “epike” ndaj Realit të Madridit. Ekipi i vogël i Katalonjës, ka vendosur zemrën në fushë për të fituar, nisur edhe nga situata ende pezull politike, pas kërkesës së Katalonjës për t’u shkëputur nga Spanja.
E mbushur me tension, por edhe entuziazëm për vendasit, ndeshja nxorri fitues skuadrën e Gironës, që mundi në finale 2-1 Realin. Madrilenët kaluan të parët në avantazh me anë të Iskos, që çoi në rrjetë topin e ardhur nga portieri, pas gjuajtjes së Ronaldos. Pavarësisht golit, lojtarët vendas nuk ndaluan së vrapuari për asnjë moment, duke goditur 2 herë shtyllën.
Në pjesën e dytë, Girona hyri edhe më e karikuar në fushë dhe sulmoi që nga minuta e parë, duke e vënë në vështirësi serioze Realin e Madridit. Pikërisht në një prej sulmeve, gjen golin e barazimit me Stuanin, që përfitoi në zonë dhe pasi dribloi mbrojtësin Naço, dërgoi topin në rrjetë.
Pak minuta më vonë, një tjetër aksion i bukur nxjerr në sulm sulmuesin Portu, që gjuan diagonal, por ndërhyn portieri Kiko Kasija i Realit, topi vjen tek Stuani që godet pa ekuilibër, aty ku ndodhet sërish Portu, që pak centimetra larg portës dërgon me finte topin në rrjetë për të dytën herë.
Reali u përpoq të ndryshonte rezultatin, por Ronaldo e Isko nuk shënuan dot, ndërsa Benzema, e ka “harruar” prej javësh si dërgohet topi në rrjetë.
Përfundimisht, Girona fiton 2-1, duke ndalur madrilenët, që tani kanë mbetur 8 pikë larg një tjetër skuadre nga Katalonja, pikërisht Barcelona kryesuese. Nuk dihet ende çfarë do të ndodhë në politikë, por në futboll, Katalonja “u shkëput” nga Madridi. /tesheshi.com/
