Kolumnisti hebre Gideon Levy shkruan se ka ardhur koha kur të gjithë izraelitët duhet të pyesin veten nëse janë gati të jetojnë në një vend që ushqehet me gjak.
Ai shtoi duke iu drejtuar bashkatdhetarëve se nuk duhet të mjaftohen me histori se nuk ka zgjidhje tjetër, duke i siguruar se në të vërtetë ka një zgjidhje.
“Së pari duhet të pyesim veten: a jemi gati të jetojmë në këtë mënyrë? A duam ne izraelitët të jetojmë në të vetmin vend në botë, ekzistenca e të cilit bazohet në gjak?
I vetmi vizion që aktualisht është i përhapur në Izrael është pranimi i jetës nga një luftë në tjetrën, nga një gjakderdhje në tjetrën, nga një masakër në tjetrën, me sa më shumë boshllëqe midis një lufte dhe tjetrës”, shkruan ai në artikullin e tij në gazetën izraelite Haaretz.
Një shtet mashtrues
Levy duket pesimist, pasi Izraeli nuk ka asnjë plan tjetër në tryezë. Ai shton se optimistët premtojnë intervale të gjata kohore midis një lufte dhe tjetrës, ndërsa mbështetësit e së djathtës ekstreme paralajmërojnë për “një realitet të zhytur në gjak në të cilin lufta, vrasjet masive, shkeljet sistematike të ligjit ndërkombëtar dhe gjendja e një shteti mashtrues përsëriten në një cikël i pafund.”
Autori pyet përsëri: “A do të dënohen palestinezët me masakra të mëtejshme dhe a do të vazhdojnë izraelitët të mbyllin sytë ndaj tyre?”
Ai përgjigjet se është e vështirë të mbështetemi në këtë situatë, sepse do të vijë koha kur izraelitët do të hapin sytë dhe do të kuptojnë se vendi i tyre mbijeton me gjak, pasi “ne nuk do të ekzistojmë pa gjakderdhje, siç na thanë”.
Pa mundësi mbijetese
Ai shpreh ndjesinë se një shtet i tillë nuk do të jetë në gjendje të mbijetojë përgjithmonë dhe se izraelitët janë të bindur se vendi i tyre nuk do të ekzistojë nëse nuk ka sakrificë në gjak. “Çdo tre vjet ka gjakderdhje në Gaza dhe çdo katër vjet në Liban. Mes asaj në Bregun Perëndimor, dhe ndonjëherë një sulm të përgjakshëm ndaj objektivave të tjerë”, tha ai, duke vënë në dukje se nuk ka asnjë vend tjetër në botë si Izraeli.
Levy kritikoi mediat izraelite, duke thënë se ata po përpiqeshin të bindin opinionin publik se luftërat dhe gjakderdhja ishin një “domosdoshmëri”. Nëpërmjet fushatave që demonizojnë dhe çnjerëzojnë palestinezët, analistët izraelitë promovojnë “me sukses” idenë se njeriu mund të jetojë përgjithmonë me gjak.
Ai vazhdon duke thënë se izraelitët tashmë kanë vrarë popullin palestinez duke filluar masakrat masive në Gaza, dhe tani ata kanë kaluar në Bregun Perëndimor. Ai paralajmëroi se rrjedhat e gjakut do të rridhnin edhe atje nëse dikush nuk i ndalonte skuadrat e vdekjes.
Ai vazhdon duke thënë se do të duhen breza që Gaza të rimëkëmbet, nëse kjo mund të ndodhë. Ai i quan gjenocid ngjarjet atje, duke theksuar se asnjë vend nuk mund të jetojë me një ideologji të tillë. /tesheshi.com/
