Aktori amerikan, George Clooney tha gjatë një qëndrimi në Kanë se miliarderi Donald Trump nuk do të jetë kurrë Presindent i SHBA, duke ia atribuar popullaritetin e kandidatit republikan, mediave të cilat sipas tij nuk dijnë të shtrojnë pyetje të vështira.

“Donald Trump nuk do të bëhet President. Kjo nuk do të ndodhë, ngase nuk duam që ankthi ta kaplojë vendin tonë. Nuk e kemi ndërmend të frikësohemi as nga myslimanët, as nga emigrantët”, ka thënë Clooney i cili ka arritur në Festivalin Ndërkombëtar të Filmit në Kanë për të prezantuar filmin “Money Monster”, në të cilin luan rolin kryesor.

Clooney ka thënë se Trump është rezultat i shumë emisioneve televizive në të cilat nuk i janë shtruar pyetje të vështira.

Ai ka apeluar tek organizatat e medias që të kthehen në kohërat tradicionale, kur roli i gazetarit ka qenë të shtrojë pyetje të vështira, duke kërkuar përgjegje të drejtpërdrejta.

“Mënyra se si informohemi sot është një fatkeqësi e madhe, për shkakun se kemi humbur aftësinë për të ardhur tek e vërteta dhe faktet, dhe për ta prezantuar atë, dhe kjo në fakt është edhe tema e filmit që do të prezentohet në Festival’’, ka thënë Clooney.

Clooney njihet si mbështetës i zëshëm dhe mbledhës i fondeve për kandidaten për President nga Partia Demokratike, Hillary Clinton. /tesheshi.com/