Presidenti i kompanisë General Motors, Dan Ammann, ka deklaruar në një intervistë se planet për investime të reja në Brazil do të rishihen nëse në periudhën në vazhdim nuk do të ketë përmirësim të situatës politike dhe ekonomike.
“Unë shpresoj të shoh përparime politike dhe ekonomike në gjashtë deri në dymbëdhjetë muajt e ardhshëm, që do të na lejojnë të vazhdojmë me planin tonë të investimit,” ka thënë Ammann për një gazetë braziliane.
Megjithëse kompania General Motors vijon ta shohë Brazilin si një treg me potencial të madh në planin afatgjatë, duhet një ndryshim i qenësishëm për ta arritur atë potencial, nënvizohet në intervistën e tij.
General Motors njoftoi vitin e shkuar se planifikonte të investonte 1.62 miliardë dollarë në teknologji dhe në produktet e reja në Brazil gjer në vitin 2019.
Brazili ka qenë deri së fundi një prej pesë tregjeve më të mëdha të botës në sektorin e automobilave, por recesioni e ka goditur keqas atë. Prodhimi i makinave dhe kamionëve ra me 29.3 për qind në janar krahasuar me të njëjtën periudhë të vitit paraardhës, e shitjet ranë me 38.8 për qind. /tesheshi.com/
