Në ‘Shih Programin’, përballë gazetarit Enkel Demi, ishte dhe deputeti demokrat Genc Ruli. Si një ish-qeveritar, politikan dhe ekonomist i sprovuar, ai tha se të ashtëquajturat reformat e qeverisë, janë më tepër reklamë për reforma:
“Tani nuk është mirë të humbasësh modestinë në asnjë sekondë, por unë jam një ndër njerëzit që kanë qenë aktor në reforma që nga ’91 më shumë sesa kjo qeveri mund të ëndërrojë edhe nja 20 vjet më pas. Dhe, në këtë pikë mund të të them se unë nuk po shoh asnjë reformë thelbësore. Po shoh atë që është një atribut bazik i kësaj qeverie: një reklamë reformash. Asnjëra prej tyre nuk është e përfunduar. Kemi një reformë pjesore në arsim, e cila hyn të paktën në nominimin reformë. Është ajo e pushtetit vendor ku pavarësisht motivimit duhej bërë më shumë në fuksion të produktit politik që ajo jep, por ama është pozitive për faktin që fillon ridimensionon shërbimin dhe funksionalitetin e pushtetit vendor. Është një tjetër reformë e pretenduar në shëndetësi, sipas së cilës shqiptarët sot duhet të kishin disa përfitime që nuk i kanë dhe nuk e di a do t’i kenë edhe pas 20 vitesh. Propagandë për reforma ka pasur shumë, por ma do mendja se në kemi bërë reforma shumë të mëdha dhe shumë më të vështira, sidomos nga ’91-‘94 kemi qenë shumë më modestë për gjithçka kemi bërë. Një reformë nuk është thjeshtë atraksioni ndaj bukurisë që ka fjala “reformë”, por është urtësia mbrapa si politikan sesi do ta realizosh. Në botë është më i madh numri i reformave që dështojnë sesa i atyre që kanë sukses.” /tesheshi.com/
