“Gazi ka të bëjë me pushtetin. Ne luftojmë për korridorin, pasi do të ndihmonte në bashkëpunim mes vendeve në Ballkan, por do të çlirojë Europën nga varësia e gazit rus.
Shqipëria luan një rol kryesor për gazsjellësin dhe ne jemi shumë pranë përmbushjes së kësaj ëndrre.
SHBA e ka mbështetur gjithmonë këtë korridor, së bashku më interkonjeksion Greqi-Bullgari, do të rrisë shumëllojshmërinë e furnizimit me energji për vendet e Ballkanit”.
Kështu u shpreh ambasadori i SHBA në Tiranë, Donald Lu, gjatë prezantimit të projektit të gazsjellësit joniano- Adriatik (IAP) nga i cili do të përfitojë dukshëm Shqipëria.
Lu tha se zgjatimi i projektit të TAP do të lehtësojë shumë qytetarët shqiptarë pasi ata do të paguajnë tashmë shumë më pak para për të.
Sipas diplomatit amerikan, në Shqipëri qeveritë kanë treguar mbështetje për TAP dhe ky është sinjali më i fuqishëm për integrimin në BE.
“Për konsumatorët shqiptar, e ardhmja sjell mundësi për investime të reja. Shqipëria shpenzoi mbi 80 milionë dollarë për energjinë këtë verë, ndërsa tani do të paguajnë më pak.
Ballkani njihet për luftërat mes fqinjëve, por gazsjellësi IAP është i rëndësishëm, pasi mbështetet në bashkëpunimin rajonal dhe sigurinë. Për këtë arsye keni mbështetjen e SHBA”, tha ambasadori Lu.
E pranishme në takim ishte dhe ambasadorja e BE-së Romana Vlahutin, e cila tha se IAP pritet të sjellë përfitime të mëdha ekonomike për Shqipërinë, dhe se “muskuli” pas kësaj sipërmarrjeje është BE.
“Jemi të kënaqur për ecurinë për projektet e gazit në Shqipëri dhe në rajon. Interesat dhe përfitimet janë të qarta për Shqipërinë dhe Ballkanin. Në muajt e fundit në Shqipëri mbështetja te energjia hidrike ka pasur pasoja, prandaj duhet të kalojë në kanale të ndryshme furnitore. Gazifikimi i Ballkanit i bën vendet jo vetëm më të ndërlidhura, por edhe më afër BE. Reforma në energji, jo vetëm që sjell përfitime për Shqipërinë, por janë edhe mundësi për investime të reja”, u shpreh Vlahutin. /tesheshi.com/
