Gjigandi rus Gazprom ka ndërmarrë një tjetër akt të rëndësishëm për të rritur pozitat e tij në Ballkan.
Siç bën të ditur portali rus Sputnik, kompania shtetërore e gazit ka firmosur një marrëveshje me presidentin serb, Aleksandër Vuçiç për të fuqizuar kapacitetet e transmetimit të gazit natyror në Serbi e Ballkan.
Sputnik thekson se Gazprom dhe Ministria e Minierave dhe Energjetikës të Serbisë nënshkruan një “Road Map”(dokument strategjik) për zhvillimin e kapaciteteve të transportit të gazit në vend.
Dokumenti u nënshkrua në kuadër të takimit nga Kryetari i Bordit Drejtues të Gazprom-it, Aleksei Miller me Presidentin e Serbisë, Aleksandër Vuçiç.
Në deklaratën e përbashkët theksohet se “kapaciteti i magazinimit të gazit nëntokësor do të rritet nga 450 në 750 milion metra kub”.
Në takim u diskutua edhe për rritjen aktuale të kërkesës për gazin rus në Serbi.
“Sipas të dhënave paraprake, nga 1 janari deri më 26 qershor 2017, Gazprom ka rritur sasinë e gazit të eksportuar në Serbi me 47.7 % krahasuar me të njëjtën periudhë në vitin 2016”, theksohet në deklaratë.
Përveç kësaj, drejtori i Gazprom-it është takuar me Drejtorin e Përgjithshëm të JP “Srbijagas”. Kompania serbe e gazit varet totalisht nga gjigandi rus i cili është edhe kreditori më i madh i konsorciumit serb, i cili tashmë menashohet totalisht nga rusët.
Ata folën për të punuar së bashku në zhvillimin e magazinimit të gazit nëntokësor “Banatski Dvor” dhe në tregun e karburantit motorik për shitjen me shumicë e pakicë, si shtrirjen e tij në të gjithë tregun e Ballkanit. /tesheshi.com/
