Kanë ardhur edhe reagimet e ndërkombëtarëve pas gazit të hedhur nga Vetëvendosje në Kuvend, duke e dënuar ashpër këtë veprim.
Ambasadori amerikan në Kosovë, Greg Delawie, deputetët e Vetëvendosjes i ka quajtur njerëz pa ide, të cilët i janë kthyer dhunës.
“Një gjë e tillë nuk duhej t’i ndodhë Kosovës, pasi Kosova është më e mirë se kaq. Kjo nuk duhet të ndodhë në një shtet evropian. Hedhja e gazit lotsjellës nuk është diçka evropiane. Ka një spektër të njerëzve që po përdorin mjetet e mirëfillta politike, kam respekt për policët që po mundohen ta kryejnë punën e tyre, përkundër vështirësive. Do t’i nxisja deputetët që të kthehen në kuvend dhe të votojnë ‘po’ për demarkacionin. Do t’i nxisja që të votojnë ‘po’ për Evropën dhe i nxis që të votojnë ‘po’ për përparimin e Kosovës”, ka thënë Delawie para mediave.
E ashpër ka qenë shefja e Zyrës së BE-së në Kosovë, Nataliya Apostolova e cila ka thënë se veprimet e tilla e kthejnë prapa Kosovën.
“E tronditur nga gazi lotsjellës në Kuvend! E shokuar që deputetët e një parlamenti në Evropë po aplikojnë taktika të rrezikshme që po e çojnë prapa Kosovën”, ka pohuar Apostolova.
Delawie dhe Apostolova, pas hedhjes së gazit lotsjellës kanë zhvilluar një takim me kryekuvendarin Kadri Veseli.
Pas hedhjes së gazit lotsjellës nga Vetëvendosje, deputetët u detyruan të lirojnë sallën ku mbahen seancat plenare të Kuvendit, ndërsa njësiti i mbrojtjes së afërt i policisë arritur në sale dhe ka kontrolluar ulëset e të zgjedhurve të Vetëvendosjes
Tani, pasi gazi u largua nga salla, aty janë kthyer deputetët e të gjitha partive. /tesheshi.com/
