Gazetarja e kronikës Klodiana Lala, i është drejtuar opinionit duke premtuar se do vijojë të punojë si gjithëherë, pavarësisht incidentit në shtëpinë e prindërve të saj.
Siç dihet tashmë, banesa e tyre në Laknas të Tiranës, është qëlluar me një breshëri kallashnikovi orët e para të mëngjesit.
Dhe dyshohet të jetë një mesazh kërcënues për gazetaren Lala, e njohur për investigimet e saj të guximshme në fushën e krimit të organizuar.
Të dashur miq!
Po ju flas në emrin tim dhe të familjarëve të mi. Jemi mirë, asnjëri prej nesh nuk është lënduar. Megjithatë, jemi të tronditur nga ngjarja. Duke i lënë institucionet të bëjnë punën e tyre, ju siguroj se unë dhe familjarët e mi, nuk kemi asnjë konflikt personal.
Dyshoj se sulmi vjen si rezultat i punës time si gazetare. Këtë profesion e kam ushtruar me ndershmëri e profesionalizëm ndër vite, e do vazhdoj ta ushtroj këtë detyrë me të njëjtin përkushtim, pavarësisht gjithçkaje.
Falenderim Ministrit të Brendshëm dhe Policisë së Shtetit që u angazhuan maksimalisht për zbardhjen e ngjarjes.
Ju jam mirënjohës secilit prej Jush që mu gjend pranë në këto momente të vështira”, përfundon mesazhi i koleges Lala. /tesheshi.com/
