Asosacioni i gazetarëve të Kosovës ka protestuar para objektit të qeverisë dhe Kuvendit në mbështetje të kryeredaktorit të gazetës online “Insajderi”, Vehbi Kajtazi, i cili u sulmua një ditë më parë.
Kajtazi ka thënë se ata që e sulmuan janë njerëz të politikës, të cilët po mundohen t’i ndalojnë të mos raportojnë.
“Ky sulm ka ndodhur për shkak të punës sime, pas një seri shkrimesh që kam pasur javën e kaluar, sepse personazhi është i lidhur direkt me ato, por këto sulme nuk do të më ndalin, përkundrazi”, ka thënë Kajtazi.
Ndërsa kryetari i AGK-së, Shkëlqim Hysenaj, u ka bërë thirrje organeve të drejtësisë që të merren më seriozisht me këto sulme ndaj gazetarëve, që sipas tij, dita ditës po rritet numri i tyre.
Vehbi Kajtazi u sulmua gjatë ditës së premte në një nga lokalet në kryeqytet. Për këtë rast disa persona janë shoqëruar më Polici. Kjo nuk është hera e parë që Kajtazi sulmohet për shkak të shkrimeve të tij. /tesheshi.com/
