“Skifterët” e diplomacisë amerikane nuk arritën të zgjidhin konfliktin në Ukrainë, si dhe situatën në Niger, ku rebelët erdhën në pushtet, ka vlerësuar gazetari amerikan dhe fitues i çmimit Pulitzer, Seymour Hersh.
Nga “diplomatët skifter” Hersh i referohet Këshilltarit të Sigurisë Kombëtare të SHBA, Jake Sullivan, Zëvendës Sekretarit të Shtetit për Çështjet Politike, Victoria Nuland dhe Sekretarit të Shtetit të SHBA, Antony Blinken.
Në një tekst analitik të publikuar në portalin Substack, Hersh vuri në dukje se në fillim të këtij muaji, negociatat për Ukrainën u zhvilluan në Jeddah të Arabisë Saudite, në të cilat përfaqësuesit rusë nuk ishin as të ftuar, dhe deklaroi se një zyrtar i paidentifikuar i inteligjencës amerikane i tha atij se këto negociata ishin ide e këshilltarit amerikan për sigurinë kombëtare, Jake Sullivan, i cili synonte ta portretizonte takimin “si një mbledhje e vendeve të botës së lirë pas humbjes poshtëruese të armikut të urryer”, domethënë Moskës.
Siç vë në dukje burimi i Hersh-it, “qershia mbi tortë” supozohej të ishte dorëzimi i pakushtëzuar i Rusisë pas kundërsulmit të shpejtë pranveror të Ukrainës.
“Administrata amerikane madje planifikoi një gjyq të ngjashëm me gjyqet e Nurembergut, me Jake Sullivan si përfaqësuesin tonë”, tha burimi për Hersh.
Pas kësaj, Zëvendës Sekretarja e Shtetit për Çështjet Politike, Victoria Nuland vizitoi Nigerin, ku një juntë ushtarake mori pushtetin pas një grushti shteti që rrëzoi Presidentin Mohamed Bazoum. Sipas Hersh, Nuland “tërhoqi prizën” dhe shkoi në Niger për të parë se çfarë mund të mbante SHBA nga fondet e saj pas rebelimit.
“Grusht shteti në Niger shihet nga ata që jetojnë në rajon jo në kontekstin e marrëdhënieve Lindje-Perëndim, por si një heqje dorë prej kohësh e nevojshme nga kontrolli ekonomik dhe politik francez,” tha Hersh, duke shtuar se ngjarje të tilla mund të përsëriten shumë herë në vende të tjera afrikane nën ndikimin francez.
Sipas një zyrtari të inteligjencës, Sekretari i Shtetit Antony Blinken, i cili donte të ndërmjetësonte në bisedimet e paqes midis Ukrainës dhe Rusisë “si ish-sekretari i Shtetit Kissinger në Paris”, dështoi.
Në sfondin e hapave hezitues të Blinken, Presidenti i SHBA Joe Biden ftoi shefin e CIA-s, William Burns në kabinetin e tij, i cili, megjithatë, nuk do të zëvendësojë sekretarin aktual të shtetit në atë pozicion, tha Hersh. /tesheshi.com/
