Gazetari turk Ahmet Külsoy ka jetuar në rrugët përreth sheshit Taksim për dy ditë, 9 dhe 10 janar, për të provuar kujdesin e njësive për të pastrehët të Bashkisë Metropolitane të Stambollit, në mënyrë që të shohë nëse ata janë efektivë në kryerjen e përgjegjësive të tyre.
Ai gjithashtu donte të shihte nëse do të vinte dikush për t’i dalë në ndihmë atij, në një mot të këtillë të ashpër.
Mëngjesin e 9 janarit Külsoy vendosi që të largohej nga shtëpia e tij e ngrohtë, për të fjetur jashtë në acarin dhe dëborën e ftohtë.
Kur njerëzit e panë atë të shtrirë në një stol në dëborë, ata i bënë një thirrje “Deskut të Bardhë” të komunës, ndërsa zyrtarët u thanë atyre se një njësi ishte nisur për t’i siguruar nevojtarit një strehim. Për fat të keq, njësitë nuk u shfaqën në ditën e parë.
Gazetari tha se temperatura prej – 10 gradë ia vështirësoi punën, ndërsa ai u përpoq t’i përballonte këto temperatura sa më mirë të mundte. “Isha krejtësisht i dëshpëruar. Mendova se do të vdisja”, tha ai.
Ditën e dytë, kalimtarët përsëri bënë një telefonatë dhe këtë herë zyrtarët e kujdesit për të pastrehët erdhën te vendi për rreth 20 minuta, e morën Külsoy në sallën e sporteve Zeytinburnu, e cila është duke u përdorur si një strehë për të pastrehët.
“Personalisht isha i kënaqur me ushqimin. Edhe të tjerët në sallë gjithashtu ishin shumë të kënaqur. Zyrtarët erdhën në sallë për kontrolle shëndetësore në bazë të rregullit dhe dhanë ilaçe për të gjithë, aq sa ishte e nevojshme”, tha ai.
“I dëgjoja njerëzit dhe historitë e tyre. Të gjithë po thoshin: “Allahu e bekoftë Turqinë që nuk jemi jashtë në këtë të ftohtë”. Pothuajse të gjithë në sallë u zgjuan në momentin kur thirri ezani në mëngjes, kur dolën jashtë dhe më pas u kthyen”, shtoi ai.
Eksperimenti i Külsoy vjen në kohën kur komuna dhe Qendra për Koordinim të Fatkeqësive (AKOM) është duke bërë çmos për të siguruar shërbime për të pastrehët, në kohën kur vendi është kapur nga një valë stuhie e dëborës. Sipas informacionit të marrë nga komuna, 921 njerëz të pastrehë janë strehuar në javët e fundit./tesheshi.com/
