Gazetari kontravers maqedonas, Milenko Nedelkovski në profilin e tij në Facebook ka kritikuar BDI-në dhe PDSH-në për anulimin që këto parti i kanë bërë garës për rivotim në Tearcë të Tetovës. Milenko po ashtu shkruan se pas Gjergj Kastriotit, shqiptarët përsëri do të kenë udhëheqësin e tyre ortodoks, duke vënë theksin te Zoran Zaevi, kryetari i LSDM-së.
“Anulimi nga gara zgjedhore në Tearcë i Aliut dhe Thaçit, apo ndonjë jokoalicionim i BDI-së dhe PDSH-së me OBRM-në do të thotë rënie e të dy partive. PDSH-ja do të bëhet PPD dhe BDI do do të jetë PDSH. Thaçi dhe Aliu do të hiqen nga skena politike. Me largimin e mundshëm nga bazat përjetshme të gjuetisë. Vendin e tyre do ta marrin dy parti tjera shqiptare, LSDM dhe Besa, dhe kryetari i ri shqiptar, Zoran Zaev. Pas një periudhe të gjatë, domethënë pas Gjergj Kastriotit, shqiptarët përsëri do të kenë udhëheqësin e tyre ortodoks”, shkruan Milenko në Facebook.
Rivotimi në Tearcë do të mbahet të dielën, ku dy partitë kryesore maqedonase, VMRO-DPMNE dhe LSDM janë në garë për një mandat, e para për ta mbajtur, e dyta për ta fituar.
Sipas rezultateve të 11 dhjetorit, në këtë vendvotim kanë votuar 404 veta, ku 91 vota i ka marrë VMRO-DPMNE, 86 LSDM; BESA 65, PDSH 64, BDI 58 dhe Aleanca për Shqiptarët 25 vota.
Diferenca në tërë njësinë 6 mes VMRO-DPMNE dhe LSDM është 307 vota. Por rivotimi në Tearcë pritet ta ndryshojë rezultatin, atë të datës 11 ku në njësinë 6 VMRO-ja mori 4 deputetë, ndërsa LSDM 3 sosh. Dhe ajo që mund të ndodhë më 25 dhjetor është kalimi i një mandati nga Gruevksi tek Zaevi, dhe më pas gjithçka barazohet me numër mandatesh, që do të thotë pamundësi e “fituesve” për të qeverisur.
Nga ana tjetër, partitë politike shqiptare kanë paralajmëruar se nuk do të marrin pjesë në votimet e të dielës në vendvotimin 2011, ngaqë sipas tyre kjo nuk e tangon interesin e shqiptarëve në mënyrë të drejtëpërdrejtë. /tesheshi.com/
M.Krasniqi – /tesheshi.com/
