Pa filluar mirë Europiani i Francës, mediat e kontinentit po akuzojnë organizatorët për masa mjaft të dobëta dhe që ka krijuar kushtet e shpërthimit të dhunës nga tifozët.
Gazetari i njohur, Pierluigi Pardo, i cili drejton emisionin kryesor sportiv në mediaset, përkatësisht në Italia1, theksoi sot në një status të twitter, se “niveli i organizimit është qesharak, pijet alkoolike shiten lirshëm ndërsa masat e sigurisë çalojnë.
Ndërkaq, gazetari i La Repubblica, Fabrizio Bocca, thekson se “përbindëshi i huliganizmit është kthyer në Europë pas 30 vitesh duke kërcënuar futbollin. Atëherë e mësuam se alkooli brenda në stadium ishte një nga shkaqet kryesore si dhe pija nëpër rrugë”.
Fenomeni u ndalua atëherë kur u morën masa drastike ndaj shitjes së alkoolit pranë vendeve publike në zonat e stadiumit dhe të zonave ku shikoheshin ndeshjet. Ai bën thirrje për masa të njëjta si në vitin 1985, pas tragjedisë së stadiumit Heysel në Bruksel, ku u zhvillua ndeshja Juventus-Liverpool dhe ndodhi tragjedia e vdekjes së mbi 41 tifozëve.
Ndërkaq, Federata Angleze e Futbollit është shprehur shumë e zhgënjyer nga sjellja e tifozëve të saj.
Në prag të ndeshjes Anglisë-Rusi, tifozët anglezë janë përleshur me rusët, ku është dashur ndërhyrja e forcave të policisë për ndarjen e dy tifozerive rivalë.
Policia ka përdorur gaz lotsjellës për qetësimin dhe shpërndarjen e turmës, ndërsa ka vënë në pranga 9 persona.
Përleshja ka vijuar edhe pas ndeshjes Francë –Rumani. Tifozët anglezë janë përleshur me tifozët francezë.
Më pas kanë shkatërruar gjithçka aty pranë. Ndërsa të plagosurit kanë qenë të shumtë.
Në një komunikatë për shtyp, Federata Angleze e Futbollit është shprehur shumë e zhgënjyer ndërsa ka dënuar episodet e dhunës duke iu bërë thirrje autoriteteve policore të marrin masat e duhura./tesheshi.com/
