Gazeta gjermane “Tageszeitung” shkruan se një prokurori shqiptar i rrezikohet jeta pas hetimeve që ka kryer mbi rrjetin e mafias së ndërtimit në Vlorë.
Nën titullin “Viktimë e korrupsionit”, media gjermane në numrin e sotëm (29gusht) sjell në vëmendje rastin e Arben Jorgaqi, duke vënë theksin në vështirësitë që përballen prokurorët shqiptarë kur hetojnë rrjete të rrezikshme.
Arben Jorgaqi është një prokuror nga Vlora, i cili humbi edhe vendin e punës dhe tani ka frikë për jetën.
Më artikull thuhet se prokurori, në fund të 30-ve, një tip modern, i interesuar për artin, që në vështrim të parë nuk duket sikur përshtatet me profesionin e tij.
“Por ai është prokuror që e merr seriozisht profesionin dhe luftën e propaganduar nga qeveria kundër korrupsionit. Arben Jorgaqi ka imazhin e një prokurori të pakorruptuar, por në majin e këtij viti u pushua nga puna. Me sa duket ai i ishte afruar shumë disa njerëzve të fuqishëm”, thuhet në artikull.
Në vijim gazeta thotë se prokurori ia doli që të hetojë dhe të zbulojë sesi persona të fuqishëm, nën petkun e biznesmenëve të ndërtimit, kishin manipuluar dosje mbi pronësinë e trojeve me qëllim që të përfitonin prona të shumta përgjatë bregdetit.
“Prokurori megjithatë mblodhi prova dhe bëri goditjen e parë. Në maj të këtij viti ai kërkoi arrestimin e disa personave të rrjetit në fjalë. Por për habinë e tij, policia nuk reagoi. Në vend të kësaj ai morri një paralajmërim dhe më pas u transferua në Përmet”, thuhet në artikull.
Gazeta gjermane raporton mbi përplasjen e prokurorit shqiptar, Arben Jorgaqi me prokurorinë e Vlorës. Lufta me autoritetet përfundoi me “lirimin” e tij nga detyra dhe më vonë me heqjen e mandatit. “As protestat në Tiranë nuk sollën gjë, prokurori i padëshiruar u largua para reformës në drejtësi nga detyra”, vijon artikulli.
Por historia e Arben Jorgaqit nuk përfundon me kaq. Ai ka marrë kërcënime pas refuzimit të 300.000 eurove.
“Arbeni u fsheh në Tiranë dhe ndërron rregullisht vendbanimin. Ai ka frikë për jetën. Shpresa e vetme është që Gjykata e Apelit në Tiranë të vendosë në favor të tij. Por për shkak të lidhjeve të politikanëve të nivelit të lartë me rrjetin e mafias së ndërtimit, ai është skeptik”, thuhet në artikullin e gazetës gjermane. /tesheshi.com/
