Që debatet e mbrëmjes në televizone kanë kapur nivelet e neverisë, u shpalos ky dimension i trishtë sa aprofesionalizmi nga moderatorët e tyre e sa nga të njëjtat fytyra të përnatshme të shndërruar në anektodike, te Top Story i së mërkurës mbrëma, ku ajo, Grida Duma, pa pikë lidhje me atë që bën, moderatoren, kish ftuar për çështjen më komplekse të botës – Palestinën – emra pa asnjë lidhje direkte me konfliktin e atyshëm. Ishin aty: eksperti Karamuço(!!!), Iris Luarasi(!!!), Artur Zheji(!!!) dhe sigurisht Curri(!!!). Pra, nuk ka mundur apo nuk ka qenë e aftë znj. Duma që të gjejë më e pakta një figurë e cila është adapte për ta shpjeguar atë që ka ndodhur apo ndodh aty në terma të njohjes së dimensionit fetar e historik të çështjes, i cili t’i ofrojë publikut fakte të panjohura më parë, t’i ofrojë qasje krejt tjera nga ato të zakonshmet për atë konflikt dhe që përcjellin njohje të thellë e jo të zakontë mbi çështjen “Gaza”. Si ka mundësi pra që individë të tillë nuk kanë kurajon të thonë “jo”, për t’jua lënë vendin më të diturve se ata për atë lloj problematike ku ndoshta nuk kanë lexuar qoftë dhe një libër, nuk citojnë qoftë dhe një autor, nuk posedojnë qoftë dhe njohuritë më minimale për atë lloj konflikti?!
Si ka mundësi që të organizohen debate me këtë nivel mjeran profesionalizmi, fyes për publikun, apo më së paku fyes për ata dhjetra apo qindra që dinë më shumë se ata mbi Palestinën e Gazën?
Çfarë na janë këto figura gjithollogësh që nuk marrin veten në llogari, që nuk kanë pikën e modestisë, që nuk kanë fijen e fisnikërisë për të mos pranuar të jenë ata kryesorët në studio duke folur për atë që duhet ta kuptojnë se janë thjesht të padijshëm, për të mos thënë injorantë?
Nuk do ishin aty nëse mjaft të kishin dëgjuar Andi Bushatin pak muaj më parë, i cili do thoshte se edhe pse ka lexuar nja dhjetë libra mbi Palestinën, konfliktin e atyshëm, prapë nuk merrte dot guximin të fliste me kompetencë.
Kjo nuk është gazetari, kjo është fyerje për publikun nga ca vanitozë e delirantë ekranesh, të cilët thjesht ta shtojnë trishtimin dhe pezmin e kësaj kohe plot trishtim e pezm edhe për shkak të tyre. Kanë pushtuar studiot, si të jenë sionistë mediatikë, duke i dhënë vetes të drejtën që nuk e kanë: për të qenë më te mençur se sa të tjerët!
Sa për shembull, të gjithë të marrë bashkë, nuk vlejnë sa qoftë dhe një figurë e vetme ndër të shumtë që mund të jenë shumë të kompletuar për Gazën e përgjithësisht Palestinën: hoxhë Sabaudin Jashari. Mjaft të dëgjohet ky kur flet për Gazën, që të detyrohesh të fusësh djath në vesh kur flasin katër emrat e mësipërm e ta ngjashëm si ata, siç ndodhte te telekomedia e famshme “Alo Alo” kur ia niste të këndonte me stonaturë të tmerrshme gruaja e shëmtuar e Rënesë. Ata që ishin rreth saj i kapte marrazi dhe zgjidhnin djathin si zgjidhje të organi i dëgjimit, mes tyre dhe vetë burri i saj. /tesheshi.com/
