Vaksinimi kundër lisë së majmunëve në Kongo do të fillojë më 2 tetor, me punonjësit e shëndetësisë që fillimisht do të fokusohen në tre provincat më të prekura, thanë zyrtarët lokalë.
Të rriturit në provincat Equateur, South Kivu dhe Sankuru do të vaksinohen së pari, tha për Associated Press Cris Kacita Osako, koordinator i Komitetit Kongolez për Luftimin e Lisë së Majmunit.
Në fillim të kësaj jave, dërgesa e parë prej 100,000 dozash vaksinash mbërriti në Kongo, epiqendra e shpërthimit. Dozat e vaksinës, të prodhuara nga kompania daneze Bavarian Nordic, janë dhuruar nga Bashkimi Evropian përmes HERA-s, agjencisë për urgjencat shëndetësore. 100,000 doza të tjera u dorëzuan të dielën.
Nevojiten tre milionë doza
Por ato 200,000 doza janë vetëm një pjesë e tre milionëve që autoritetet kanë thënë se nevojiten për t’i dhënë fund epidemisë së lisë së majmunëve në Kongo. Vendet e Bashkimit Evropian janë zotuar të dhurojnë më shumë se 500,000 doza, por afati i fundit për dorëzimin e tyre mbetet i paqartë.
Kongo ka dhënë miratimin urgjent për një vaksinë tashmë në përdorim në Evropë dhe SHBA. Vaksinimi do të rezervohet për të rriturit dhe grupet e synuara prioritare janë ata që kanë qenë në kontakt të ngushtë me personat e infektuar dhe punonjësit e seksit, u tha gazetarëve të premten Drejtori i Përgjithshëm i Qendrës Afrikane për Kontrollin dhe Parandalimin e Sëmundjeve, Dr. Jean Kaseya.
Që nga fillimi i vitit 2024, ka pasur 5,549 raste të konfirmuara të lisë së majmunëve në të gjithë kontinentin, me 643 vdekje, që përfaqëson një rritje të madhe të infeksioneve dhe vdekjeve në krahasim me vitet e mëparshme.
Shumica e infeksioneve, te fëmijët nën 15 vjeç
Rastet në Kongo përbëjnë 91 për qind të numrit të përgjithshëm të personave të infektuar. Shumica e infeksioneve të lisë së majmunëve në Kongo dhe Burundi, vendi i dytë më i prekur, janë te fëmijët nën moshën 15 vjeç.
Qendra Afrikane për Kontrollin dhe Parandalimin e Sëmundjeve dhe Organizata Botërore e Shëndetësisë (OBSH) nisën një plan reagimi ndaj shpërthimit në mbarë kontinentin të premten, tre javë pasi OBSH shpalli një emergjencë globale një shpërthim të lisë së majmunëve në 12 vende afrikane.
Agjencia Evropiane e Barnave po shqyrton të dhëna shtesë për t’i zbatuar ato te fëmijët e moshës 12 deri në 17 vjeç, gjë që mund të ndodhë në fund të muajit, tha drejtori i përgjithshëm i HERA-s, Laurent Muschel. /teheshi.com/
