Komisioni i Senatit për Marrëdhënie me Jashtë miratoi të mërkurën emërimin e diplomates Yuri Kim për postin e ambasadores së Shteteve të Bashkuara në Shqipëri – raporton VOA.
Për t’u bërë zyrtar, emërimi i saj duhet të miratohet tashme dhe nga Senati.
Zonja Kim, ishte emëruar nga Presidenti Donald Trump në qershor të këtij viti
Në një seancë para Komisionit të Jashtëm të Senatit për konfirmimin e saj në fund të tetorit, ajo tha se do të nxiste udhëheqësit e vendit për të zgjidhur ngërçin aktual politik në mënyrë që të forcohet perspektiva e hapjes së negociatave të anëtarësimit në BE.
Zonja Kim shtoi se do të inkurajonte gjithashtu Shqipërinë të zbatonte plotësisht reformat në drejtësi, përfshirë kontrollin e figurës së gjyqtarëve dhe prokurorëve dhe krijimin e strukturave të posaçme për luftën kundër korrupsionit dhe krimit të organizuar.
Ajo tha se sheh si përparësi edhe ndihmën teknike për Shqipërinë në hetimin, ndjekjen dhe ndëshkimin e korrupsionit dhe krimit të organizuar ndërnacional.
Zonja Kim tha gjithashtu se do të inkurajonte Shqipërinë për të arritur nivelin 2 përqind në shpenzimet e mbrojtjes deri në vitin 2024.
Zonja Kim tha se nëse konfirmohet, do të punonte gjithashtu për të nxitur eksportet dhe investimet amerikane në Shqipëri.
Ajo bëhet gati të vijë në kulmin e një krize politike lidhur me emërimet në Gjykatën Kushteuese, ku ndërkohë, nga Presidenca po sulmohen rregullisht ndërkombëtarët, përfshi së fundi dhe SHBA-të, nën pretendimin se po i dhurojnë drejtësinë kryeministrit Rama. Për presidetin Meta dhe një pjesë të lidershipit opozitar, Reforma në Drejtësi – një investim europian-amerikan – ka dështuar. /tesheshi.com/
