Presidenti turk Rexhep Tajip Erdogan do të zhvillojë të premten një vizitë njëditore në qytetin bregdetar rus të Soçit për t’u takuar me homologun e tij rus Vladimir Putin për të diskutuar lidhjet dypalëshe dhe çështjet ndërkombëtare.
Erdogan dhe Putin do të takohen personalisht për herë të dytë në 17 ditë. Ata u takuan më parë në kryeqytetin iranian, Teheran, për një takim trepalësh me presidentin iranian Ebrahim Raisi.
Udhëheqësit u mblodhën për samitin e 7-të të formatit të Astanës për të diskutuar zhvillimet e fundit në Siri, luftën kundër grupeve që përbëjnë një kërcënim për sigurinë rajonale, veçanërisht YPG/PKK-në dhe ISIS-in, si dhe situatën humanitare dhe kthimin vullnetar të sirianëve.
Përveç Sirisë, Erdogan dhe Putin do të diskutojnë edhe për luftën ruso-ukrainase, e cila po vazhdon prej gjashtë muajsh.
Falë përpjekjeve diplomatike të Turqisë për të zhbllokuar eksportet e grurit nga Ukraina, anija e parë me drithëra që la një port ukrainas në luftë kaloi nëpër ngushticat turke pas inspektimeve në Stamboll të mërkurën, rrugës për në Liban. Shumë besojnë se kjo dërgesë është për të ndihmuar në zbutjen e krizës globale të ushqimit.
Më 22 korrik, Turqia, OKB-ja, Rusia dhe Ukraina nënshkruan një marrëveshje historike për të rihapur tre porte ukrainase për eksportet e drithit që ishin bllokuar prej muajsh: Odesa, Chernomorsk dhe Yuzhny.
Në takim, Erdogan dhe Putin do të vlerësojnë marrëdhëniet dypalëshe, duke u fokusuar në fushat e ekonomisë, tregtisë dhe energjisë që përfaqësojnë forcën lëvizëse të lidhjeve turko-ruse. /tesheshi.com/
