Projekti i përbashkët i 18 agjencive evropiane të lajmeve, European Newsroom (ENR), do të lançohet zyrtarisht këtë javë në një ceremoni në Bruksel, në prani të përfaqësuesve të Komisionit Evropian dhe të ftuarve nga bota e politikës, diplomacisë dhe medias.
ENR u krijua me qëllim të promovimit të bashkëpunimit dhe shkëmbimit të përvojave ndërmjet korrespondentëve të agjencive pjesëmarrëse në projekt.
Korrespondentët do të kenë akses në dy hapësira të dekoruara në mënyrë moderne në të cilat mund të punojnë.
ENR ka nisur punën më 1 korrik, ndërsa fillimi i punës zyrtarisht do të shënohet të martën.
Mbroni qytetarët e BE-së nga dezinformatat
Në hapje do të marrin pjesë nënkryetarët e KE-së Margaritis Schnas dhe Vera Jourova, si dhe rreth 200 të ftuar.
“Është e një rëndësie thelbësore të sigurohet dhe zgjerohet raportimi i pavarur dhe i besueshëm nga Brukseli dhe të mbrohen qytetarët e Bashkimit Evropian nga dezinformatat, dhe ky është qëllimi i ENR-së”, tha Peter Kropsch, drejtor i agjencisë gjermane të lajmeve dpa.
Ai shton se rritja e bashkëpunimit mes korrespondentëve dhe rrjetëzimi i tyre do të çojë në një cilësi më të lartë të punës gazetareske.
ENR publikon dy herë në javë përmbledhje të disa lajmeve të zgjedhura të publikuara më parë nga secila agjenci.
Çdo agjenci bën një përmbledhje në gjuhën e saj dhe prej saj bëhet një përzgjedhje e lajmeve, të cilat përkthehen në anglisht, frëngjisht dhe gjermanisht.
Një herë në javë, ENR publikon një histori në anglisht për një temë të rënë dakord më parë, në të cilën mund të marrin pjesë të gjitha agjencitë.
Agjencitë pjesëmarrëse në projekt: AFP (Francë), ANSA (Itali, AGERPRES (Rumani), APA (Austri), ATA (Shqipëri), Belga (Belgjikë), BTA (Bullgari, DPA (Gjermani), EFE (Spanjë), Evropa Press (Spanjë), Fena (Bosnje dhe Hercegovinë), Hina (Kroaci), MPB (Maqedonia e Veriut), STA (Slloveni), Tanjug (Serbi), TASR (Sllovaki), PAP (Poloni) dhe Ukrinform (Ukrainë).
Shpërndarja ndërkufitare e informacionit
Komiteti drejtues përbëhet nga përfaqësues të pesë agjencive, të cilat përbëjnë thelbin e ENR – DPA, AFP, ANSA, Agerpress dhe Hina.
Projekti ENR është i bashkëfinancuar nga BE.
Iniciatorët e projektit të përbashkët besojnë se rrjeti ndërkombëtar i agjencive të pavarura të lajmeve përfaqëson një pjesë të rëndësishme të shpërndarjes së besueshme ndërkufitare të informacionit në Evropë. /tesheshi.com/
