Shqipëria ka shënuar një rekord ulje infeksionesh në 24 orë, vetëm 2 sosh, që të dyja në Durrës, e që kanë lidhje me një vatër te rë infeksioni në një fasoneri. Ndërkohë, vdekjet janë hequr në gati dy javë nga lista.
Dr. Eugena Tomini nga Instituti i Shëndetit Publik dha detajet, duke thënë se “sot është dita me numrin më të ulët të rasteve pozitive të konfirmuara, që nga fillimi i epidemisë”.
“Janë testuar 168 qytetarë si të dyshuar si të prekur me Covid19 dhe kanë rezultuar pozitivë 2 qytetarë, në Qarkun Durrës. Të shëruar janë 12 qytetarë.
Rastet e reja janë kontakte të personave që tashmë rezultojnë pozitivë, ndërkohë që po vazhdon hetimi epidemiologjik aktiv në terren.
Marrja në kohë e masave për distancimin fizik, vetëizolimi i ndërgjegjësuar, masat e higjienes personale dhe respiratore patën peshën kryesore ne shfaqjen e një kurbe epidemike të butë në vend.
Deri më sot janë kryer mbi 12,500 testime dhe janë konfirmuar pozitivë me COVID-19 në të gjithë vendin 948 qytetarë. Prej tyre, rreth 77% janë të shëruar.
Në vendin tonë aktualisht janë 190 persona aktivë me COVID19, kryesisht ne Tiranë, Durrës Krujë, Shkodër.
Gjendja në spitale paraqitet e qëndrueshme prej ditësh me 15 pacientë të shtruar dhe vetëm 3 prej tyre janë në terapi intensive”, u tha ndër të tjera në deklaratë. /tesheshi.com/
