Rezultatet e anketimeve tregojnë se pothuajse 40 për qind e votuesve amerikanë do të dëshironin që kandidati Donald Trump të tërhiqej nga gara presidenciale pas publikimit të një videoje ku ai i drejtohet gjinisë femërore në mënyrë vulgare.
Bazuar në opinionin publik të portalit Politico dhe të agjencisë Morning Consult, 39 për qind e votuesve duan që Trump t’i japë fund fushatës së tij.
Megjithatë, një numër më i madh i votuesve, 45 për qind, edhe më tutje beson se ai do të duhej ta vazhdonte fushatën, ndërsa vetëm 13 për qind e republikanëve do të dëshironte ta ndërrojë kandidatin.
Anketa po ashtu tregon se kandidatja demokrate, Hillary Clinton, është më e popullarizuara nga të gjithë kandidatët, ngase ka mbështetjen e 42 për qind të votuesve.
Sondazhi është kryer pas skandalit të fundit të Trump-it, në lidhje me një regjistrim të vitit 2005, në të cilin ai dëgjohet duke bërë komente vulgare ndaj gjinisë femërore, e ku morën pjesë më shumë se 1.500 votues të regjistruar. /tesheshi.com/
