Shumë talente të rinj me prejardhje nga Kosova po shkëlqejnë në fusha të ndryshme nëpër shtete të huaja. Një prej tyre është Anjesa Limani, 13-vjeçarja, me origjinë nga Lipjani, që jeton në Norvegji, e cila ditë më parë u shpall kampione e Evropës në sportin akrobatik që kërkon shumë talent dhe që quhet Cheerleading, ndërsa në moshën 10-vjeçare u shpall kampione e Norvegjisë.
Anjesa, në një intervistë për tesheshi.com tregon pse vendosi të merret pikërisht me këtë sport, sa është i vështirë, cilat janë synimet, po ashtu flet edhe për Kosovën…
Intervistoi: Blendi Gashi
Jeni veç 13 vjeç, por korrni suksese në sportin akrobatik që quhet Cheerleading. A mund të na tregoni nga erdhi ideja të merrrni me këtë sport dhe sa është i vështirë?
Ideja më erdhi pasi e pashë një shoqe timen në shkollë që merrej me akrobatik. Më pëlqej shumë dhe fillova këtë sport të vështirë që kërkon disiplinë si në ushtrime dhe në ushqim.
Ushtrime duhet bërë rregullisht 4-5 herë në javë deri në 4 orë. Kushdo që synon të merret me këtë sport duhet të mos ketë frikë pasi është i rrezikshëm nëse nuk respektohen rregullat e trajnerit.
Në vitin 2015 kur ishit në moshën 10-vjeçare u shpalle kampione e Norvegjisë. Si e kujtoni atë kohë?
Ishte një kënaqësi tejet e madhe dhe një moment i paharrueshëm për mua. Pas këtij suksesi unë vazhdova të punoj edhe më shumë dhe puna mu shpërblye pasi fitova medaljen e artë në Evropian, pra u shpalla kampione e Evropës në këtë sport.
Pra siç thatë edhe vetë tashmë jeni kampione Evrope. A mund të na tregoni sa ishte gara e ashpër?
Gara ka qenë shumë e vështirë pasi 27 shtete kanë garuan për të njëjtin titull. Pra vetëm një garues triumfon andaj duhet të jesh në fokus, e qetë dhe e përgatitur.
Kupa e artë (titulli, Europa champion ) ka qenë ëndrra ime që u bë realitet dhe kështu më është hapur mundësia që të kualifikohem për kampionatin botëror që do mbahen në prill të 2019-tës në Florida të Amerikë. Shpresoj se do arrijë të bëhem dhe kampione e botës.
Ju jeni tejet e re, pra tani 13-vjeçare. Cilat janë synimet tuaja në karrierë?
Pas pjesëmarrjes në Kupën e Botës synoj të marrë pjesë në Lojërat Olimpike. Tani jam shumë e re për të konkurruar dhe duhet të pres deri të mbushi 16 vjet.
Po ashtu synoj të bëhem trajnere një ditë si dhe të vazhdoj shkollimin, kur të rritem të bëhem avokate ose juriste.
Ju jetoni në Norvegji dhe përfaqësoni sigurisht këtë shtet. Mediat atje janë të interesuara për prejardhjen tuaj dhe ç’ju thoni ju për Kosovën?
Unë jam shumë krenare që jam shqiptare, dhe nuk e fsheh kurrë prejardhjen time. Mezi pres të vij çdo vjet në Kosovë. Unë shoqeve e shokëve të mi por edhe të tjerëve ju them që në Kosovë njerëzit janë shumë të afërt, të sjellshëm dhe se është një vend i bukur.
A ju ka kontaktuar dikush nga krerët e institucionet kosovare për t’ju uruar për sukseset e arritura apo jo?
Vetëm përmes internetit fitoren ma kanë uruar deputetja Evgjenie Thaçi dhe Vlora Limani që është halla ime, njëherit drejtoreshë e Shëndetësisë në Lipjan. Tani jemi për rrugë duke ardhur në Kosovë dhe shpresoj se dhe urime tjera do më vijnë.
A keni informata sa është i përhapur ky sport në Kosovë?
Aq sa jam në dijeni ky sport nuk ekziston ende në Kosovë.
Cili është mesazhi i juaj për rininë kosovare?
Porosia ime për rininë kosovare, veçanërisht për moshatarët e mi është të merren sa më shumë me sport, me atë që ju pëlqen atyre.
Siç e thashë dhe më herët sporti i Cheerleading është jo pak i rrezikshëm dhe duhet pasur trajnerë të kualifikuar. Sa më shumë sport e shkollim është porosia ime. /tesheshi.com/
