Nga Blendi Gashi
Zgjedhjet lokale të 22 tetorit përveç Prishtinës do të sjellin një garë tejet të ashpër edhe në komunën e Prizrenit, që njihet si bastion i PDK-së, pasi kjo parti e qeverisë atë që nga 2007-ta, për tre mandate rresht me Ramadan Mujën.
Për të rimarrë edhe një mandat, Kadri Veseli ka zgjedhur një figurë të njohur për prizrenasit, por jo brenda partisë. Bëhet fjalë për Shaqir Totajn i cili së fundmi ka udhëhequr Administratën Tatimore të Kosovës në Prizren.
Në prezantimin e Totajt, kreu i PDK-së ka shprehur bindjen se edhe në katër vitet e ardhshme do t´a drejtojnë këtë komunë.
Përkundër kësaj Veseli është tejet i vetëdijshëm se nuk do t´a ketë të lehtë të mbajë këtë bastion pasi kryetari aktual Ramadan Muja dhe disa drejtorë janë të akuzuar për shpërdorim të detyrës zyrtare.
Ndaj përtej fjalëve kreut të PDK-së i duhet të djersitet shumë, që të bindë prizrenasit të përkrahin partinë e tij.
Ja kandidatët që do të tentojnë të thyejnë bastionin e PDK-së
Për të thyer PDK-në në Prizren, partitë tjera kanë përzgjedhur kandidatët më të mirë për kryetar.
LDK-ja e Isa Mustafës e cila qeverisi me këtë qytet nga paslufta e deri në vitin 2007, në zgjedhjet e 22 tetorit do të tentojë ta rikthejë atë me ish-deputetin Hatim Baxhakun.
Edhe pse jo një kuadër i ri, Baxhaku është një doktor i respektuar nga prizrenasit dhe vlerësohet si sfiduesi më i madh i Totajt.
Një kandidat tjetër që mund të befasojë dhe thyejë PDK-në është kandidati i Vetëvendosje-s Mytaher Haskuka, i cili me profesion është psikolog.
Haskuka vlerësohet një kandidat serioz për faktin se që dy herë në zgjedhjet parlamentare ka marrë përkrahjen të madhe nga prizrenasit ku ka fituar postin e deputetit.
Kandidat tjetër serioz është edhe Zafir Berisha i NISMA-s, ish-figurë e lartë e PDK-së, që Thaçi fitoi Prizrenin falë tij.
Berisha, i cili ka mbajtur edhe postin e deputetit në disa legjislatura, gëzon respekt të madh në Prizren veçanërisht për kontributin e dhënë në çlirimin e vendit, në luftën e fundit si ish-ushtar i UÇK-së.
Në një intervistë që ka dhënë për tesheshi.com, ai është shprehur tejet i sigurt se do ta rrëzojë ish-partinë e tij nga pushteti pasi gjatë dhjetë viteve ka keqqeverisur komunën.
Ndërsa AAK-ja e Ramush Haradinajt do të garojë sërish në Prizren me Lulëzim Kabashin një biznesmen, por që nuk pritet që të befasojë pasi në zgjedhjet e 2013-tës ka dalë veç i treti.
Duke parë këto kandidatura gjasat janë të mëdha që asnjë prej tyre të mos fitoi në raundin e parë. Kështu balotazhi dhe pëkrahja mes partive do të jetë përcaktues nëse do të thyhet apo jo ky bastion dhjetë vjeçar i PDK-së. /tesheshi.com/
