Ndryshe nga kandidati Selami i cili përqëndrohet tek kriza që po kalon PD, rivali i tij, kreu i vetëngrirë i demokratëve Basha, po i mëshon më fortë betejës me qeverinë, për të rimarrë kreun e partisë.
Ai vijon të denoncojë, si zgjedhjet e 25 qershorit, rezultatin e të cilave e quan fiktiv, ashtu dhe qeverisjen e Ramës.
“Qytetarët ishin skeduar me metodat e sigurimit famëkeq. Paratë ishin shpërndarë, ata mbaheshin nën vrojtim me ndihmën e një shteti të bërë njësh me krimin, administratës, shërbimeve, ndihmës sociale, subvencioneve, legalizimeve, me mediat të gjitha të kapura dhe të vëna në shërbim të pushtetit dhe gjithçka tjetër. Në këto kushte u zhvilluan zgjedhjet e 25 qershorit. Në këto kushte mazhoranca që ka dalë nga 25 qershori është një mazhorancë fiktive. Nuk reflekton vullnetin e njerëzve aq sa e reflektonte ajo e 91-shit, për rrethana të njëjta apo të ngjashme. Reflekton frikën, dëshpërimin, reflekton varfërinë që këta e thelluan. Ne jemi te vetmit që kemi moralin forcën, kurajon vizionin dhe planin për ta nxjerrë Shqipërinë nga kriza. Nuk ka dritë në fundin e tunelit të Edi Ramës”, tha Basha këtë të shtunë, gjatë takimeve në Durrës, Shijak e Rrogozhinë. /tesheshi.com/
