Pas shpalljes së exit-polleve të publikuara nga Klan Kosova për shtatë qendrat kryesore të Kosovës rivalët e vjetër PDK dhe LDK kanë vrapuar për të dalë në konferenca ku kanë shpallur fitoren në nivel vendi.
Anëtari i Kryesisë së PDK-së, Abelard Tahiri dhe deputetja Blerta Deliu – Kodra kanë shpallur fitoren e PDK-së në nivel vendi përmes një konference për media, ku kanë falënderuar të gjithë qytetarët për besimin e dhënë dhe gjithë komisionerët, vëzhguesit dhe aktivistët e partisë për angazhimin e tyre në mbarëvajtjen e procesit zgjedhor.
“PDK ka hyrë në balotazh në numrin më të madh të komunave. Çdo herë që ka fituar Partia Demokratike e Kosovës, kanë fituar vetë qytetarët e vendit tonë, lagjet, fshatrat dhe qytetet e tyre. Këtë frymë triumfuese të Partisë Demokratike të Kosovës do ta vazhdojmë fuqishëm dhe do ta kurorëzojmë me fitore në balotazh”, ka thënë Tahiri.
Kurse deputetja Blerta Deliu-Kodra, poashtu tha se PDK është fituese në nivel nacional.
“Në 16 komuna, PDK është fituese, në shumicën e tyre prijmë me vota e në disa prej tyre jemi në balotazh. Jemi fitues në Prizren, Mitrovicë, dhe Ferizaj. Presim rezultate edhe në Gjakovë, Gjilan, Suharekë dhe Podujevë. Qytetarët edhe njëherë vërtetuan se PDK është adresa kryesore për vendin”, u shpreh ajo.
Mustafa: Jemi partia e parë…
Edhe kryetari i LDK-së, Isa Mustafa, ka thënë se partia e tij është fituese e zgjedhjeve lokale të mbajtura këtë të diel.
Sipas Mustafës, LDK ka fituar nëntë komunat që i ka udhëhequr deri tash, ndërsa synon të fitojë 15 për të arritur më shumë se gjysmën e komunave total me shumicë shqiptare.
“Sipas gjitha informatave, po dalim partia e parë. Do të kemi numrin më të madh të komunave të Kosovës. Bindshëm do t’i mbajmë nëntë komunat që kemi qeverisur dhe do t’i fitojmë edhe komunat tjera. Do të kemi mbi 15 komuna, apo më shumë se gjysmën e komunave me shumicën shqiptare”, ka thënë ai. /tesheshi.com/
