Nga Blendi Gashi
Deklarimi i hapur i Vetëvendosje-s përmes sekretarit të saj, Dardan Molliqaj se janë të hapur për koalicion me LDK-në por pa Isa Mustafën dhe partitë tjera përjashtuar PDK-në e Kadri Veselit, qysh tani ka hapur garën ndërmjet partive duke e bërë tejet të paparashikuar qeverisjen e re.
Ndërsa si koalicioni më i mundshëm pas zgjedhjeve të reja shihet ai mes PDK-së e AAK-së, pasi këto parti po afrohen gjithjë e më shumë mes vete, tashmë pas deklarimit të VV-së, siç duket partia e Haradinajt dhe AKR-ja e Pacollit do jenë vendimtare nëse do ketë ndërrime në qeverisje apo jo.
Analistët politikë thonë se partitë politike kanë dëshmuar se pikë së pari kanë interesin andaj nuk përjashtohet asnjë koalicion, përveç atij PDK-VV, derisa pohojnë se partia fituese do e përcaktojë se kush do jetë në qeveri.
Analisti politik Fatmir Sheholli, konsideron se sondazhet apo anketimet për të gjithë skenën politike duhet bërë ndonjë kompani shumë e besueshme ndërkombetare, sepse sondazhi i një partie kontestohet nga partitë tjera.
Sa i përket koalicioneve të mundshme, ai thotë se koha ka treguar se jo rrallë herë përcaktues është faktori ndërkombëtar, pasi ato janë krijuar edhe brenda natës.
“Ajo që mund ta them është që Kosova është e lodhur nga shumë tema të cilat e kanë kapluar. Ka nevojë për ‘heqjen e mjegullës’, që e ka kapluar. Mos të harrojmë se na presin tema shumë sfiduese siç janë; vazhdimi i dialogut me Serbinë, liberalizimi i vizave, shënjimi i kufirit me Malin e Zi, Asociacioni i komunave me shumicë. Këto tema janë ne top agjendë, andaj partitë politike të cilat do t’i ofrojnë votuesve zgjidhjen praktike të këtyre temave besoj që do kenë përspektivë në zgjedhjet e ardhshme parlamentare”, thotë Sheholli për tesheshi. com.
Faik Krasniqi, njohës i rrethanave politike mendon se ajo parti që del e para në zgjedhje, do ta krijoi edhe qeverinë, derisa shton se nuk do të befaoshej nëse lidhet një koalicion mes partive që bëjnë nga akuzat nga më të rënda kundër njëri-tjetrit.
“Nëse VV-ja del partia e parë, atëherë e shohë një koalicion VV-AAK-NISMA dhe eventualisht AKR-së. Ndërkaq, cilado parti që futet në koalicion me PDK-në, jo vetëm që do ta tregojnë fytyrën e tyre të gënjeshtarëve, por do ta pësojnë sikurse LDK-ja, e cila do të pësojë debakël në zgjedhjet e ardhshme për shkak të tradhëtisë që i bëri elektoratit të saj”, shprehet Krasniqi për tesheshi. com.
Kurse analisti Nexhmedin Spahiu mendon se koalicionin e ardhshëm do e përcaktojë partia apo koalicioni që do i fitojë zgjedhjet.
“Lojën do ta përcaktojë fituesi i zgjedhjeve. Fituesin do ta përcaktojë partitë që do të sigurojë koalicion më të gjerë parazgjedhor”, thotë Spahiu për tesheshi. com.
Kujtojmë se nga paslufta PDK-LDK kanë bashkëqeverisur më së shumti, derisa asnjëherë nuk është ndërtuar koalicioni i ashtuquajtur i luftës PDK-AAK, për çka pas zgjedhjeve të reja shihet si më i mundshmi. /tesheshi.com/
