“Muslimanët e rinj janë në presion që të braktisin karrierën në politikë për shkak të mashtrimeve të pista dhe sulmeve personale që po e përshkruajnë garën për kryebashkiakun e Londrës“, bëri me dije kandidati i laburistëve, Sadik Khan.
Khan shfrytëzoi një ceremoni të ndarjes së çmimeve, në të cilën mori pjesë z.Greg Clark, Sekretar për Komunitete, ku gjithashtu ishin dhe muslimanë të spikatur në fushën e sportit, medias dhe biznesit, për të njoftuar se fushata negative, e cila ka në qendër të vëmendjes lidhjet e tij me persona të dyshuar për ekstremizëm, është duke ndikuar në armiqësimin e komunitetit.
“Njerëzit më janë afruar sonte, por edhe gjatë ditëve dhe javëve të fundit duke më thënë: ‘Z. Khan, biri apo bija ime, nipi apo mbesa ime, vëllau apo motra ime, është duke menduar të bëjë karrierë në politikë, në administratë publike ose ketë pjesëmarrje aktive në jetën publike. Por janë të brengosur. Ata janë të brengosur ngase nëse kjo është ajo që ju jeni duke e vuajtuar, atëherë brengosemi se po në të njëjtën mënyrë do vuajmë edhe ne’,” tha ai.
“Dhe e tërë ajo që dëshiroj t’ju them është se: ‘Ju sigurisht se e dini… prindërit tuaj apo gjyshërit tuaj kanë qenë gjenerata e parë e emigrantëve dhe për ta ka qenë më vështirë sesa për ne. Kur ata arritën për herë të parë në këtë vend, hasën në mbishkrime: ‘Jo njerëzve me ngjyrë, Jo irlandezëve, ‘Jo qenve.’ Por ata sakrifikuan, kontribuan në ndërtimin e xhamive, lobuan tek parlamentarët për të lejuar ushqimin hallall, lobuan për femrat të veshin çfarë ato dëshirojnë dhe lobuan për krijimin e kushteve për adhurim dhe trajtim të barabartë. Ua kemi borxh atyre që të vazhdojmë të punojmë shumë dhe të jeni të sigurtë që ne do të bëjmë historinë.”
Në anën tjetër, z. Khan ka akuzuar strategun e zgjedhjeve të z. David Cameron, z. Lynton Crosby si përgjegjës kryesor për fushatën negative të udhëhequr nga rivali i tij, Zac Goldsmith.
Ai tha se z. Goldsmith dhe kryeministri do të ndiejnë keqardhje për këtë strategji përçarëse elektorale, dhe akuzoi z. Lynton për udhëheqjen e fushatës “negative“.
“Zac Goldsmith të cilin unë e njoh është një person sharmant, i këndshëm, shoqërohet me njerëz të feve të ndryshme, e kupton rëndësinë e unitetit dhe respekton diversitetin e Londrës,” tha ai.
Komentet e z. Khan erdhën pasi David Cameron e akuzoi atë të ketë pasur lidhje me ekstremistët, duke e akuzuar atë se ishte ngjitur disa herë në podium me imamin e Londrës Jugore, për të cilin z. Cameron është shprehur se është përkrahës i Shtetit Islamik.
Kryeministri u prit me thirrje si “racist” nga anëtarët e Parlamentit. Javën e kaluar, Theresa May, Ministrja e Punëve të Brendshme, gjatë konferencës pranverore të konservatorëve u shpreh se ishte e shqetësuar për fushatën e Z. Khan kundër ekstradimit të Babar Ahmad, i cili ishte arrestuar në Britaninë e Madhe pa aktatuzë dhe i cili u burgos në SHBA për shkak se, siç thuhet, kishte mbështetur grupet terroriste.
Marrë nga: The Indipendent – /tesheshi.com/
