Mirosllav Lajçak fillon këshillimet e përqendruara në dialogun Serbi-Kosovë këtë javë, tha të hënën zëdhënësi i Shërbimit të Veprimit të Jashtëm Evropian, Peter Stano.
“Mandati i Përfaqësuesit të ri Special të BE-së është të arrijë një normalizim gjithëpërfshirës të marrëdhënieve midis Serbisë dhe Kosovës, që nënkupton rinisjen e dialogut”, tha ai në Bruksel.
I pyetur nëse Lajçak do të kishte një mandat të ndërhynte në çështje të tjera rajonale, veçanërisht në marrëdhëniet midis Serbisë dhe Malit të Zi, në dritën e Ligjit për Lirinë e Fesë, Stano nuk dha një përgjigje specifike, por kujtoi se një pjesë e mandatit të Lajçakut ka të bëjë edhe me përmirësimin e marrëdhënieve të fqinjësisë së mirë dhe pajtimin midis partnerëve në Ballkanin Perëndimor.
“Qëllimi është të ndihmojmë në tejkalimin e trashëgimisë të së kaluarës, por gjithashtu të kontribuojmë në efektivitetin dhe konsistencën e politikës së BE në Ballkanin Perëndimor”, përfundoi Stano.
Kur Lajçak u emërua si Përfaqësuesin e ri Special të BE-së, u theksua se mandati i tij do të lidhej kryesisht me dialogun Serbi-Kosovë.
Ministri i Jashtëm i BE Josep Borrell, për detyrat e para të Lajçak, tha se ai do ndihmojë të rihapet dialogut Serbi-Kosovë dhe t’i kushtojë vëmendjen e nevojshme.
“Në fillim të mandatit tim, unë thashë se ishte një nga prioritetet e mia dhe gjërat ku duhet të përmirësohemi. Ne mund të mos kemi zgjidhur problemin izraelito-palestinez, por ne duhet të jemi në gjendje ta zgjidhim problemin në lagjen tonë të ngushtë,” tha Borrell. /tesheshi.com/
