Austria është ndalesa e nëntë në kampionatin e gjatë të garave automobilistike të Formula 1-shit. Në pistën austriake janë zhvilluar provat zyrtare, që kanë nxjerrë të parë pilotin britanik të Mercedes-it, Lewis Hamilton.
Kanë qenë prova ku nuk kanë munguar incidentet, shiu, ndërprerja e pilotimit. E mes gjithë këtyre andrallave, Hamilton ka mundur të bëjë një xhiro të përsosur në fundin e provave, duke siguruar vendin e parë në nisje të garës ditën e nesërme.
Shoku i tij i skuadrës, Nico Rosberg, do të zinte vendin e dytë, por dënimi me pesë vende, i dhënë për ndërhyrje në makinë, bën që ta shohim atë në vend të shtatë në nisje. Një garë në të përpjetë ka për të qenë ajo e së dielës për gjermanin, që do të bëjë ç’është e mundur për të arritur mes të parëve në finish, mundësisht i pari, edhe pse duket paksa e vështirë.
Vettel, që gjithashtu bëri një paraqitje të mirë me Ferrari-n e tij, duke u pozicionuar i katërti, do të niset nga vendi i nëntë po për të njëjtin shkak.
Këto ndryshime në renditje nxjerrin në vend të dytë në nisje Hulkenberg-un e Force India-s, por dhe ai mund të marrë një dënim, pasi është nën hetim nga komisarët e garës, sepse nuk ka ulur shpejtësinë nën flamujt e verdhë.
Më në fund do të shohim një McLaren në krye. Button do të niset i treti falë këtyre ndryshimeve, pasi në prova do të renditej i pesti.
Kjo do të jetë dhjetëshja e parë nesër në nisje pas dënimeve të aplikuara për dy prej pilotëve: Hamilton, Hulkenberg, Button, Raikkonen, Ricciardo, Bottas, Rosberg, Verstappen, Vettel dhe Massa.
E para garë e Çmimit të Madh të Austrisë, në Red Bull Ring, është zhvilluar në vitin 1970. Pista është e gjatë 4.326 km, e në të do të kryhen 71 xhiro. Rekordin e pistës e mban legjenda e F1-shit, Michael Schumacher, me kohën 1:08.337, të arritur në vitin 2003.
Gara nis të dielën në orën 14:00. /tesheshi.com/
