Ndërsa Rusia ka vendosur të armatosë Serbinë, SHBA do të furnizojë aleatët e saj në Ballkan me armë të fundit të prodhimit amerikan.
Kroacia do të marrë sisteme raketore nga SHBA, kurse Shqipëria do të fuqizojë artilerinë dhe këmbësorinë e saj me mjete të fuqishme zjarri e transporti.
Mbërritja e 6 autoblindave të parë nga Pentagoni për ushtrinë shqptare ka hapur tashmë serinë e disa kontigjentesh luftarake që do t’i vijnë Shqipërisë falas nga Armata e Shteteve të Bashkuara të Amerikës.
Bëhet fjalë gjithsej për 1130 makineri ushtarake të blinduara për këmbësorinë dhe logjistikën, që janë miratuar që nga administra e Barack Obamës, ku përfshihet një ndihmë e gjerë e Pentagonit për ushtritë e Kroacisë, Shqipërisë, Malit të Zi, Kosovës dhe Maqedonisë.
Shqipëria do të furnizohet me 3 parti ndihmash; 250 do të jenë autoblinda Hummer të fjalës së fundit që do të përdoren nga Brigadat e Ndërhyrjes së Shpejtë, të cilat përveçse janë të shpejta dhe të blinduara kundër predhave, janë të armatosura me mitroloz të kalibrit 7 milimetër, si dhe raketahedhës kundër tankeve dhe mjeteve të tjera të blinduara.
Ndërkaq, trupat e artilerisë së lëvizshme të ushtrisë do të furnizohen nga partia e dytë e ndihmës që pritet të nisë të vijë në fund të këtij viti.
Bëhet fjalë për mjete të motorizuara dhe blinduara artilerike, që përveç mitrolozit kanë të inkorporuar edhe top që gjuan me rreze të shkurtër dhe të mesme veprimi.
Armët luftarake për njësitë e motorizuara janë gjysmë tanke, edhe me zinxhirë edhe me rrota të blinduara, të cilët janë gjysmë amfibe.
Numri i tyre pritet të jetë goxha i madh, por ende mbahet sekret, pasi nuk ka ardhur ende partia e parë.
Ndërkaq, pjesa e tretë e ndihmës amerikane për Forcat e Armatosura Shqiptare do të jenë pajisje logjistike, si mjete transporti të vogla por edhe kamionë të mëdhenj që do të përdoren për transportim tankesh e mjetesh të blinduara, si dhe mjete për transportin e municioneve.
E gjitha kjo parti ndihme do të zëvendësojë plotësisht arsenalin rus dhe kinez të ushtrisë shqiptare, duke zhdukur përfundimisht çdo armë, municion apo logjistikë të modelit lindor.
Ndërkaq ushtria shqiptare ka hequr në 70% të saj kallashnikovët që i ka zëvendësuar me pushkën M16.
Përveç pushkës automatike amerikane ushtria shqiptare do të furnizohet edhe me armë automatike të prodhimit turk. Një pjesë e madhe e arsenalit ushtarak për këmbësorinë do t’i falet Shqipërisë nga ushtria e Arabisë Saudite, e cila ka zëvendësuar plotësisht arsenalin e vjetër duke blerë në 5 vitet e fundit një armatim të ri.
Vetë ambasadori amerikan në Tiranë, Donald Lu, deklaroi se Shqipëria do të jetë një nga 4 vendet europiane që përfitojnë këtë ndihmë.
“Qeveria e SHBA është e përkushtuar të forcojë aftësitë tuaja si aleat i NATO-s. Kjo aftësi e re do të jetë një hap vendimtar që FA të Shqipërisë të arrijnë objektivin parësor të NATO-s që të kenë një grup këmbësorie të modernizuar plotësisht operacional dhe autonom deri në 2019”, tha ambasadori Lu, në ceremoninë e dhurimit që u zhvillua je në repartin special të ushtrisë në Zall-Herr.
Dikur bazë e Tankeve për të gjithë Tiranën dhe Shqipërinë e Mesme, kjo bazë do të magazinojë thuajse totalisht sasinë e armatimit amerikan.
Ky arsenal është dhuratë e ushtrisë amerikane për forcat e armatosura shqiptare, e cila do të paguajë vetëm për transportin dhe mirëmbajtjen.
Autoblindat hummer që erdhën dje do të mbërrijnë të ndara në dy kontigjente, pjesa e parë prej 70 brenda muajit mars dhe 180 të tjerat të ndara në disa lote deri në gusht 2018. /tesheshi.com/
