Kriza e thellë në PD po ka dhe anën e saj teatrale. Nga selia e saj ka dalë premtimi se do ketë një model amerikan fushate, për zgjedhje e kryetarit të ri të partisë.
Këshilltarët amerikanë të Bashës, gjatë fushatës zgjedhore, para se të largoheshin, i përgatitën dhe një skemë se si të shpëtonte nga vala e sulmeve që nisi pas humbjes: Garë brenda partisë e modelit amerikan, ku madje dhe kandidatin rival dukej se ia kanë lënë në “paketë” .
Përballë tij, si i vetmi një kandidat tashmë, është shqiptaro-amerikani Eduart Selami. Ky i fundit ishte i pari që shpalli kandidaturën pa krijuar më parë një grup mbështetës në parti, por vetëm me vokacionin e krijuar gjatë muajve para zgjedhjeve si një kritik i Bashës.
Ndërkaq grupi i vërtetë i kundërshtarëve të Bashës mbetën pa një kandidat; ata nuk përfaqësohen në këtë garë me Selamin.
Madje e kanë cilësuar garën Basha-Selami një farsë duke shprehur kështu dyshimin se rivali i kësaj gare “amerikane” që vjen po ashtu pas një jetë të gjatë në Amerikë, është futur në garë vetëm për të legjitimuar zgjedhjet për rizgjedhjen e Bashës. Dhe mesa duket akuza e tyre nuk është krej pa bazë.
Burime nga selia blu i thanë tesheshi.com se Selami nuk ka aspak mbështetje në bazën e partisë, saqë rrezikon t’i dështojë dhe fushata. Asnjë anëtar partie nuk ka shprehur gadishmërinë për të marrë pjesë në takimet e tij që do të organizohen nëpër rrethe deri më datën 22 korrik kur bëhet edhe votimi.
Kësisoj, burimet thanë se ka qenë vetë kryetari Basha që u ka kërkuar krerëve të degëve që të organizojnë dhe të mbushin sallën ku do të flasë Selami.
Kandidati për kryetar nuk ka arritur të mbledhë pranë vetes as një ekip të vogël mbështetësish që t’i ketë si përfaqsues në qendrat e votimit apo t’i nisin njoftimet për shtyp duke e bërë kandidimin e tij më shumë një veprim publik, ku Tv-të i kushtojnë jo pak vëmendje, se sa një kandidim real për të bindur bazën e demokratëve.
Kjo do të thotë se gjihtë fushatën e Selamit do t’a organizojnë njerëzit e Bashës.
Takimet me bazën do të caktohen në të njëjtën ditë dhe në të njëjtën sallë, madje Basha do të flasë gjithmonë i dyti me qëllim që të mos ndodhë boshatisja e sallës nga militantët kur të flasë Selami.
Prova e parë ishte në Lezhë ku në të njëjtën sallë njëri pas tjetrit dy rivalët prezantuan platformat e tyre për ringritjen e partisë. Basha kishte zgjedhur të dilte i dyti pas Selamit, një truk ky që e mbajti sallën të mbushur edhe gjatë kohës që fliste Selami.
Duke folur para mbështetësve realë të Bashës, Selami tha sot se “platforma e tij do të rikthejë meritokracinë brenda Partisë Demokratike” dhe se “nga kjo garë Partia Demokratike do të dalë shumë më e fortë”.
Në fakt nga kjo garë PD-ja mund të jetë vetëm një kopje në pamje të parë e fushatave amerikane ku kandidatët rivalë përballen me njëri-tjetrin në një garë demokratike, por në realitet duket se partitë politike në Shqipëri janë ende shumë larg demokratizimit të vërtetë brenda tyre. /tesheshi.com/
