Dy skuadrat e Stambollit luajtën mbrëmë në Antalja finalen e 54-t të Kupës së Turqisë. Në fund të një prej sezoneve më të vështira në historinë e vet, Gallatasaraji arriti ta bënte të tijin më së paku trofeun e këtij aktiviteti.
Mes një atmosfere të ndezur, në një stadium të mbushur plot, u luajtën 90 minutat e derbit të Stambollit të zhvendosur në Antalja. Gallatasaraji e dominoi pjesën e parë, kur dhe shënoi golin e parë dhe të vetëm të ndeshjes. Gjermani Podolski u gjet në minutën e 31-të në vendin e duhur, duke e goditur topin me kokë pranë portës dhe duke e çuar në rrjetë.
45 minutat e dyta ishin krejt tjetër. Me një Gallatasaraj të tërhequr plotësisht, e me një Fenerbahçe në
kërkim dëshpërimisht të golit. Të një goli barazimi, që pavarësisht përpjekjeve e rasteve, nuk erdhi.
Nga fundi i lojës nuk do të mungonin dhe përplasjet mes lojtarëve. Bashkë me tensionin e shtuar, pasuan dhe një numër kartonash të të dy ngjyrave.
Në fund, Gallatasaraji fitoi 1-0, për të koleksionuar të tretin trofe radhazi të Kupës së Turqisë.
Në pesë finalet e luajtura mes tyre në Kupën e Turqisë, Gallatasaraji ia ka dalë të triumfojë në të tëra. Ky ishte trofeu i 17-të i fituar nga Gallatasaraji në këtë veprimtari të futbollit turk. /tesheshi.com/
