Në prani të 12.500 mbështetësve në “Abdi İpekçi Arena,” Gallatasaraj Odeabank fitoi mbrëmë trofeun e Eurocup-it, aktivitetit të dytë europian në basketboll për meshkuj, pas Euroleague-s.
Biletat qenë shitur brenda pesë minutave më 19 prill, një interes që është shpërblyer me suksesin e parë të Gallatasarajit në arenën europiane.
Skuadra e Stambollit priti mbrëmë në takimin e dytë final Strasburgun. Francezët e patën fituar sfidën e parë finale, të para pesë ditëve, me rezultatin 66-62, por nuk arritën mbrëmë të mbanin të njëjtin ritëm.
Lojtarët e Gallatasarajit treguan një entuziazëm të jashtëzakonshëm, së bashku me publikun, në një takim që pati një finale fantastike. Ndërsa vendasit kryesonin me 13 pikë, miqtë arritën ta shkurtojnë diferencën. Gabime të shumta nga të dyja skuadrat në minutat e fundit, teksa kapiteni i Gallatasarajit, Sinan Güler, qe vendimtar me topat e rrëmbyer kundërshtarit e me koshat e shënuar.
Takimi përfundoi 78-67, duke e bërë Gallatasarajin fitues të Eurocup-it. Stephane Lasme shënoi 16 pikë për Gallatasarajin, duke u shpallur dhe lojtari më i vlefshëm i finaleve. Po kaq pikë realizoi për vendasit dhe Errick McCollum.
Ergin Ataman, trajneri i Gallatasarajit, tejet i gëzuar, do të thoshte pas takimit final: “Jam krenar për ekipin, për lojtarët, për tifozët, për Gallatasarajin, e për basketbollin turk.”
Veç fitores së Eurocup-it, Gallatasaraji siguroi dhe të drejtën për të luajtur në Euroleague në sezonin e ardhshëm. /tesheshi.com/
