Edhe mediat më të mira ndërkombëtare gabojnë e bien pre e informacioneve jo të sakta. Kjo ka ndodhur me një gazetar të agjencisë prestigjioze të lajmeve, BBC, i cili ka lajmëruar nëpërmjet një postimi në Twitter, shtrimin në spital dhe më tej, vdekjen e mbretëreshës Elizabet, gjë që nuk është aspak e vërtetë.
Ahmen Khaëaja, ky është emri i gazetarit, i cili kërkoi ndjesë në llogarinë e tij, duke fshirë postimin e mëparshëm. Ai nuk jep shpjegime në lidhje me këtë gafë, ndërsa bën me dije se kishte lënë diku larg tij për disa minuta aparatin celular, nga i cili është bërë postimi i këtyre mesazheve të gabuara.
I menjëhershëm ka qenë edhe reagimi i Buckingham Palace, nga ku është përgënjeshtruar lajmi dhe është thënë se mbretëresha ndodhet në gjendje shumë të mirë shëndetësore.
Edhe BBC ka kërkuar ndjesë publike dhe në mënyrë zyrtare. “Gjatë një prove teknike për një nekrologji, disa postime janë publikuar në mënyrë të gabuar në llogarinë e një gazetarëve tanë, ku sipas këtij publikimi thuhet se një prej pjesëtarëve të familjes mbretërore është ndier keq. Postimet janë hequr në mënyrë të menjëhershme dhe kërkojmë ndjesë nëse kemi ofenduar dikë”,- thotë zëdhënësi i medias prestigjioze, duke bërë edhe një gafë tjetër, sipas disa komentuesve.
Sipas burimeve zyrtare pranë mbretëreshës bëhet me dije se ajo ka qenë në spital për një vizitë rutinë dhe se ndodhet në gjendje shumë të mirë shëndetësore. /tesheshi.com/
