Nga Blendi Gashi
Policia e Kosovës është vënë në ndjekje të deputetit të Partisë Demokratike të Kosovës (PDK) Azem Syla, pasi i njëjti dyshohet se me 50 persona të tjerë shpronësuan toka në vlerë prej 30 milionë euro.
Policia e Kosovës dhe EULEX-i sot e kërkuan komandant “Dajën” në shtëpinë e tij në Kishnarekë të Drenasit si dhe në Prishtinë, por nuk e gjetën.
Deputeti Syla u raportua gjatë ditës se gjindet në Shqipëri, konkretisht në qytetin e Durrësit, por të gjitha këto informata deri më tani janë jozyrtare.
Por çështja e arratisë së deputetit Syla ka vënë në pah një gafë të madhe të bërë nga Prokuroria e Shtetit.
Kjo e fundit përmes një kumtese për media ka thënë se Syla është duke u kërkuar qe dhjetë ditë por nuk po arrinë ta gjejnë.
“Udhëheqësi i grupit, Azem Syla, deputet i Parlamentit, është në arrati në këtë moment. Me gjithë përpjekjet e vazhdueshme të Policisë së Kosovës gjatë dhjetë ditëve të fundit për ta përcaktuar vendndodhjen e Azem Sylës, ai nuk është gjetur dhe i ka ikur administratës“, thuhet në komunikatë.
Por Prokuroria e Shtetit para se të bëj një deklaratë të tillë të papërgjegjshme (për të cilën ndoshta dikush duhet të jap llogari), është dashur të hulumtojë paksa dhe të vërtetojë se deputeti Syla në dhjetë ditët e fundit jo vetëm që ka qenë në Kosovë dhe lehtë i kapshëm për ta vënë para drejtësisë, por ka marrë pjesë edhe në tubim të partisë dhe në përurim të një shkolle.
Më 25 prill Azem Syla përuroi një shkollë në Komoran të Drenasit
Se qëndrimet e prokurorisë janë të pavërteta, tregon më së miri pjesëmarrja e deputetit të PDK-së, Azem Syla, para dy ditësh në përurimin e shkollës fillore “Xheladin Gashi – Plaku” në fshatin Komoran të Drenasit, ku prezent në këtë tubim ishin edhe dy drejtuesit më të lartë të shtetit, kryeministri Isa Mustafa dhe kryekuvendari Kadri Veseli.
Portali mbarëkombëtarë tesheshi.com ka siguruar foto nga profili i Facebook-ut të kryekuvendarit Kadri Veseli, ku deputeti Syla shihet në dy foto më datë 25 prill në aktivitetin e përurimit të shkollës në fshatin Komoran të Drenasit.
Azem Syla edhe më 21 prill ishte në Kosovë
Fakt tjetër që dokumenton gafën e rëndë të Prokurorisë së Shtetit, është edhe pjesëmarrja e deputetit Azem Syla në mbledhjen e Këshillit Drejtues të PDK-së të mbajtur më datë 21 prill ku Syla shihet prezent dhe atë duke duartrokitur fjalimin e Kadri Veselit që është në garë për të marrë drejtimin e partisë.
Është sërish kryekuvendari Veseli që ka shpërndarë foton nga mbledhja e partisë në të cilën shihet prezent deputeti Syla, tashmë në arrati. /tesheshi.com/
