Nga Blendi Gashi
Përveç bllokadës, Kuvendin e Kosovës në seancën e së enjtes (1 tetor), e ka karakterizuar edhe një rast mjaft specifik, që nuk ka ndodhur më parë.
I gjendur sërish para situatës së njëjtë, ‘barakadimit’, të foltores së tij nga opozita, kryekuvedari Kadri Veseli bëri një gafë, ndoshta për të mos ardhur deri te ndonjë eskalim i situatës dhe njëkohëisht ka dashur të tregoi se është i interesuar që në çdo formë të dialogoi me opozitën për të gjetur një zgjedhje.
Kryeparlamentari Veseli pas bisedimit me deputet të opozitës, konkretisht kryetarin e Grupit parlamentar të Lëvizjes ‘Vetëvendosje’, Glauk Konjufca, ia mundësoi të flet nga mikrofoni që i takon të parit të Kuvendit.
Veseli me veprimin e tij siç duket ka dashur të parandaloj ndonjë përplasje me opozitën, gjithmonë duke pasur në mëndje momentin kur parardhësit të tij Jakup Krasniqi deputeti opozitar ia kishte tërhequr me forcë.
Ky, gjest i Veselit sado që mund të duket ‘xhentelmen’, opozita e quan një gafë të madhe të bërë nga kryekuvendari Veseli, pasi thonë se mikrofonin e tij e vuri në dispozicion të deputetëve që po e bllokojnë Kuvendin.
Se kryeparlametari Veseli nuk e drejtoi në mënyrën e duhur seancën tregoi edhe momenti që fjalën së pari ia dha së pari Grupit të tretë parlamentar në Kuvend, pra ‘Vetëvendosjes’. Sipas, rregullores së Kuvendit, fjalën së pari duhet ta merr Grupi më i madh parlamentar që në këtë rast është Partia Demokratike e Kosovës (PDK), pastaj Lidhja Demokratike e Kosovës (LDK) e më pastaj ‘Vetëvendosje’, si partia e tretë.
Deputeti i LDK-së, Arben Gashi e quajti të papranueshme që deputeti Glauk Konjufca foli prej mikrofonit të kryekuvendarit Veseli.
Nëse Veseli s’është në gjendje ta drejtojë seancën, të dorëhiqet
Deputetja e LDK-së, Alma Lama, përmes një postimi bërë në Facebook ka thënë se kryeparlamentari Veseli nuk është në gjendje ta drejtoj seancën ai duhet të jap dorëheqje.
“Ai po mbyll punimet në vend që t’i vazhdojë ato; ai po deklaron se sigurimi i Kuvendit nuk do të hyjë në sallë, në vend që të citojë rregulloren e Kuvendit për situata të tilla. Sot bëri gafën e radhës, mikrofonin e tij e vuri në dispozicion të deputetëve që po e bllokojnë foltoren, në vend që të drejtojë seancën. Këto sjellje janë miratim i bllokadës, për mendimin tim. Bllokimi fizik i foltores dhe punës së Kuvendit është precedent i rrezikshëm, ku pakica me dhunë po tenton të imponojë qëndrimet e saj, e kjo demokratike nuk është. Nëse opozita nuk pajtohet me Marrëveshjen e Asosacionit, le ta sjell në Kuvend iniciativën për anulimin e saj dhe le të votohet për të. Pra le të triumfojë vullneti i shumicës së deputetëve si përfaqësues të sovranit. Bllokimi i foltores është rrugë qorre”, shprehet Lama.
Deputetët opozitarë thonë se janë të vendosur që të bllokojnë punimet e Kuvendit, deri atëherë kur kryeministri Mustafa të heq nënshkrimet nga marrëveshjet e fundit të arritura në Bruksel.
Ndryshe, kryekuvendari Veseli ka thënë se vendosi që të dorëzohet para deputetëve opozitar dhe të ndërpresë punimet e Kuvendit dhe mos të thërras seancë as për ditën e nesërme, por ka paralajmëruar se kjo nuk do të tolerohet pafundësisht.
/tesheshi.com/
