Vendet e Grupit të Shtatë (G7) pritet të shpallin një ndalim të importeve të diamanteve ruse në dy-tre javët e ardhshme, u thanë gazetarëve sot zyrtarët belgë, në një përpjekje për të kufizuar më tej të ardhurat që mund të ndihmojnë në financimin e përpjekjeve të luftës së Rusisë në Ukrainë.
Embargoja, e propozuar nga Belgjika, qyteti i së cilës Antwerp është qendra më e madhe në botë për tregtinë e diamanteve, do të hyjë në fuqi në janar, u tha gazetarëve në Bruksel një zyrtar qeveritar, duke folur në kushte anonimiteti.
Nëse shpallet ndalimi i kësaj tregtie me shumë miliardë dollarë, siç pritej, masa do të çojë në një ndarje në tregun global të diamanteve pasi G7 përbën pothuajse 40% të këtij tregu.
“Ne po flasim për ristrukturimin e një tregu global,” tha zyrtari, duke pranuar se sistemi nuk do të funksionojë menjëherë në mënyrë perfekte dhe se G7 është ende duke vlerësuar planin e propozuar të Belgjikës.
“Rusia është furnizuesi më i madh në mbarë botën. Me këtë sistem po i shkurtojmë duke i lënë në një treg vartës me çmime më të ulëta. Ne po ndërpresim flukset financiare nga kjo industri”.
BE bleu 1.4 miliardë euro diamante ruse vitin e kaluar
Përpjekjet për të ulur të ardhurat e Rusisë nga eksporti i diamanteve dhe për të forcuar sanksionet ekzistuese të Uashingtonit kundër Alrosa-s së Rusisë, prodhuesi më i madh në botë, kanë qenë në diskutim mes udhëheqësve të G7 që nga viti i kaluar.
BE bleu 1.4 miliardë euro diamante ruse vitin e kaluar, sipas Eurostat, pasi nuk e kishte ndaluar importin e gurëve të çmuar ose nuk e kishte futur në listën e zezë Alrosa. BE-ja kishte hedhur më parë idenë për të vazhduar më vete me një ndalim, por Belgjika ishte e shqetësuar se kjo do të devijonte tregtinë në qendra të tjera dhe larg Antwerpen. Për më tepër, BE-ja zë vetëm rreth 15% të tregut global. /tesheshi.com/
