Njësi të ndryshme të Forcave të Sigurisë së Kosovës dhe Policisë së Kosovës kanë parakaluar nëpër sheshet kryesore të Prishtinës, kryeqytetit të Kosovës, me rastin e 15-vjetorit të shpalljes së Pavarësisë së Kosovës.
Mijëra qytetarë me flamuj të Kosovës në duar, të rreshtuar në anë të rrugës, përshëndetën ushtarët dhe policët, ndërsa në skenën e madhe të ngritur në sheshin Zahir Pajaziti, ishte i pranishëm elita më e lartë shtetërore e Kosovës, si dhe mysafirë nga jashtë, përfshirë presidentin e Shqipërisë, Bajram Begaj dhe zëvendëspresidenten e Bullgarisë, Iliana Iotova.
Në paradë folën presidentja e Kosovës Vjosa Osmani dhe kryeministri Albin Kurti.
Osmani tha se periudha që po kalon Kosova në këtë kohë të sfidave dhe kërcënimeve globale, “e shton nevojën për bashkim në front për të mirën e Republikës”.
Osmani theksoi se personeli i ushtrisë dhe policisë janë “pjesa më e shkëlqyer e historisë së re të Kosovës”.
“Ne kemi sukses vetëm kur jemi bashkë. Republika jonë është e shenjtë dhe ne duhet ta mbrojmë dhe ta trajtojmë si të tillë”, theksoi Osmani.
Kurti në fjalën e tij tha se barazia dhe drejtësia janë ndër elementet që e karakterizojnë shtetin e Kosovës.
Ai ka theksuar se “ritmi i ecjes së Kosovës përcaktohet nga ritmi i këmbëve të ushtarëve dhe policëve”.
“Në këtë 15-vjetor, ritmin e ecjes sonë e përcakton ritmi i hapave të ushtarëve dhe policëve të Kosovës. Këta djem dhe vajza që do të marshojnë janë bijtë dhe bijat e këtij vendi që janë betuar se do ta mbrojnë me jetë sovranitetin, rendin dhe ligjin e Kosovës”, ka theksuar Kurti. /tesheshi.com/
