Alban Meha tregohet vendimtar në rikthimin sensacional të skuadrës së tij Konyaspor në duelin me Oslmanispor. Mesfushori i kombëtares shqiptare vazhdon të jetë në formë të mirë pasi mori notën maksimale në këtë javë. Meha ka realizuar në minute e 61-të duke e kthyer në epërsi skuadrën e tij (2:1). Goli i tij i dha fitoren Konyasporit.
Gol realizoi edhe Përparim Hetemaj me skuadrën e tij Chievo Verona. Mesfushori shqiptar ka “bombarduar” portën e kampionëve aktualë të Italisë, Juventusit duke i sjellë një pikë skuadrës së tij, për me tepër që kaloi skuadrën e tij në epërsi. Në fund ndeshja përfundoi me rezultat të barabartë (1:1). 
Debutimi i Canës nuk i ndihmoi edhe aq shumë skuadrës së Nantes që u mposht në shtëpi nga Rennes (2:0). Kapiteni i përfaqësueses shqiptare luajti gjatë gjithë ndeshjes, madje ai u tradhëtua nga bashkëlojtarët Adryan dhe Sigthorsson që u ndëshkuan me karton të kuq dhe e lanë skuadrën me dy futbollistë më pak. Pikërisht, për shkak të kartonit të kuq në këtë sfidë mungoi anëtari tjetër i përfaqësueses shqiptare, Ermir Lenjani.
Këtë fundjavë ka debutuar edhe Adnan Januzaj me skuadrën e tij të re Borussia Dortmund. Sulmuesi me prejardhje shqiptare u përfshi në lojë në minutën e 60-të, duke zëvendësuar gjermanin Hoffman. Verdhezinjtë në fund triumfuan ndaj Hanoverit në udhëtim (4:2), dhe vazhdojnë të kryesojnë kampionatin gjerman.
Po në Bundesligën gjermane ka debutuar edhe një shqiptar tjetër. Fjala është për Arianit Feratin, mesfushorin 18-vjeçar që u hyri në lojë në minutën e 79-të, me skuadrën e tij Stuttgart. Për fatin e tij jo të mirë, “shfabat” humbën në udhëtim nga Hertha Berlin (2:0).
Shaqiri e Xhaka ngujohen në fundin e tabelës. Deri sa Xherdan Shaqiri ishte i plotë në disfatën e Stoke City-t në udhëtim ndaj Arsenalit (2:0), Granit Xhaka mungoi në disfatën që Monchengladbach e pësoi në shtëpi nga Hamburgu (3:0).
Shqiptarët e Zvicrës ndahen në paqe. Dueli ndërmjet Luzernit dhe Grasshoper përfundoi me rezultat të barabartë (3:3). Njërin nga golat e ndeshjes për Grasshoperin e realizoi mbrojtësi me origjinë shqiptare, Alban Pnishi. Në këtë duel për Luzernin u aktivizuan edhe dy futbollistët e përfaqësueses shqiptare Jahmir Hyka dhe Migjen Basha. Ndërsa Hyka luajti gjatë gjithë ndeshjes, Basha u fut në lojë vetëm në pjesën e dytë të ndeshjes. /tesheshi.com/
