Futbollistët e La Liga-s do të lejohen të fillojnë nesër stërvitjet në komplekset e klubeve, ashtu si edhe klubet në rajone të veçanta në Itali, përfshirë këtu edhe klubet romane, Roma dhe Lazio.
Qeveria spanjolle, me respektim të rreptë ndaj masave të rrepta parandaluese, i ka lejuar lojtarët e klubeve që nesër të fillojnë aktivizim individual në qendrat stërvitore, dhe të gjithë futbollistët dhe stafi i klubit pritet t’i nënshtrohen testimit në tre ditët e ardhshme.
Stërvitja në grup do të lejohet vetëm në javët e ardhshme, me rinisjen e La Liga-s që pritet në fund të qershorit.
Autoritetet në Itali gjithashtu kanë lejuar lojtarët në disa rajone që të kthehen në seancat stërvitore të pezulluara më parë për shkak të pandemisë COVID-19.
Trajnimi individual për lojtarët e futbollit lejohet në rajonet Emilia-Romagna, Campania, Lazio dhe Sardenja.
Ekzistojnë gjithsej tetë klube të Serisë A në këto rajone: Bologna, Sassuolo, Spal, Parma, Napoli, Lazio, Roma dhe Cagliari.
Trajnimi ekipor për klubet në Itali është planifikuar të fillojë në 18 maj, siç u njoftua më herët nga qeveria italiane, dhe nuk dihet ende kur Seria A mund të rifillojë. /tesheshi.com/
